நடந்து முடிந்த ஊரக உள்ளாட்சித் தேர்தலில் பாட்டாளி மக்கள் கட்சி தருமபுரி மாவட்டத்தில் கணிசமான அளவு வெற்றிபெற்றுள்ளது. தருமபுரி மாவட்டத்தில் பாமக போட்டியிட்ட 60 விழுக்காடு இடங்களில் வெற்றிபெற்றுள்ளதாகக் கருத்துகணிப்புகள் தெரிவிக்கின்றன.
சமீபத்தில் நடந்துமுடிந்த மக்களவைத் தேர்தலில் பாமக சார்பில் அக்கட்சியின் இளைஞரணித் தலைவர் அன்புமணி ராமதாஸ் தருமபுரி தொகுதியில் போட்டியிட்டார். ஆனால் அவர் திமுக வேட்பாளரிடம் 40 ஆயிரம் வாக்குகள் வித்தியாசத்தில் தோல்வியைத் தழுவினார்.
தற்போது அவர் மாநிலங்களவை உறுப்பினராக உள்ளார். இருப்பினும் தருமபுரியின் மீது அவருக்கு ஒரு பார்வை இருந்துகொண்டே உள்ளது என்பதைக் காட்டும்வகையில் தருமபுரி-மொரப்பூர் ரயில் திட்டப் பணிகளை அவ்வப்போது பார்வையிடும் அலுவலர்களைச் சந்தித்து அழுத்தம் கொடுத்துவருகிறார்.
இதன் காரணமாக தற்போது நடைபெற்று முடிந்த உள்ளாட்சித் தேர்தலில் பாமக தருமபுரி மாவட்டத்தில் மூன்றாவது பெரிய கட்சியாக வெற்றிபெற்றுள்ளது. அதிமுக கூட்டணியில் இடம்பெற்றிருந்த பாமகவுக்கு கேட்ட இடங்கள் வழங்கப்படாவிட்டாலும் அவர்களுக்கு ஒதுக்கப்பட்ட பகுதிகளில் பெரும்பான்மையாக வெற்றிபெற்றுள்ளனர்.
இதன்மூலம் நாடாளுமன்றத் தேர்தலில் பெற்ற தோல்வியை தாண்டி பாமக அதிக இடங்களில் உள்ளாட்சித் தேர்தலில் வெற்றிபெற்றுள்ளது. மேலும் தருமபுரி, நல்லாம்பள்ளி, காரிமங்கலம், பாலக்கோடு, அரூர், கடத்தூர், பாப்பிரெட்டிபட்டி என மொத்தம் 37 ஊராட்சி ஒன்றிய கவுன்சிலர் பதவிகளைப் பிடித்துள்ளது குறிப்பிடத்தக்கது.
இதையும் படிங்க: நாசா வெளியிட்ட ஒலியையே திருத்தி பதிவிட்ட ஆளுநர் கிரண் பேடி! வறுத்தெடுக்கும் நெட்டிசன்கள்!
