’அடிக்கல் நாயகன் எடப்பாடி பழனிசாமி’ - கனிமொழி கிண்டல்!

தருமபுரி: அதிமுக ஆட்சியில் அனைத்து திட்டங்களுக்கும் அடிக்கல் மட்டுமே நாட்டப்படுவதாகவும், எதையும் செய்து முடிப்பதில்லை என்றும் திமுக மகளிரணிச் செயலாளா் கனிமொழி விமர்சித்துள்ளார்.

தருமபுரி மாவட்டம் பாப்பிரெட்டிபட்டி தொகுதியில், விடியலை நோக்கி ஸ்டாலினின் குரல் நிகழ்ச்சியின் இரண்டாம் நாளான இன்று, திமுக மகளிரணிச் செயலாளா் கனிமொழி பிரச்சாரம் மேற்கொண்டார். அப்போது பழைய தருமபுரி பகுதியில் செய்தியாளா்களை சந்தித்த அவர், ”இந்த ஆட்சியால் எந்த பயனும் இல்லை என மக்கள் முடிவுக்கு வந்திருக்கிறார்கள். விவசாயிகளை பாதிக்கும் சட்டங்களை முதலமைச்சர் ஆதரிக்கிறார். வேலைவாய்ப்புகள் இல்லை, அடிப்படை வசதிகள் இல்லை.

தருமபுரியில் சிப்காட் தொடங்கி வைப்பதாக அறிவிப்பு வெளியாகியுள்ளது. ஆனால், அடிக்கல் நாயகனான முதலமைச்சர் அடிக்கல்லை மட்டும் நாட்டிவிட்டு எதையுமே செய்து முடிப்பதில்லை. மதுரை எய்ம்ஸ் மருத்துவமனைக்கும் அடிக்கல் நாட்டப்பட்டது, அப்படியே கிடக்கிறது. கேஸ் சிலிண்டர் விலை உயர்வால் பெண்கள் விறகடுப்பில் சமைத்து கஷ்டப்படக் கூடிய சூழல் உருவாகியுள்ளது.

பெட்ரோல் டீசல் விலை உயர்வால் பல பகுதிகளில் விவசாயிகள் மீண்டும் மாட்டு வண்டி பயன்படுத்தக் கூடிய நிலையை பார்க்க முடிகிறது. இந்த ஆட்சியில் தொடர்ந்து மக்களின் வாழ்நிலை பின்னோக்கியே சென்று கொண்டிருக்கிறது. கரோனாவால் அனைவரது வாழ்வும் கேள்விக்குறியாகியுள்ள சூழலில், பெட்ரோல் டீசல் விலையை ஏற்றியதால், உணவு பொருட்கள் முதல் காய்கறிகள் வரை விலை அதிகரிக்கும் நிலை உள்ளது” என்றார்.

இதையும் படிங்க: சசிகலா கைகாட்டிய எடப்பாடி பழனிசாமி... 4 மாதங்கள் டூ 4 வருடங்கள்