எஸ்.ஐ போல் நடித்து பணம் வசூல் செய்த துணை நடிகை கைது!

கடலூர்:  சிதம்பரத்தில் காவல் உதவி ஆய்வாளர் போல் நடித்து பணம் வசூலித்து வந்த துணை நடிகை சூரியப் பிரியாவை காவல் துறையினர் கைது செய்தனர்.

சென்னை நீலாங்கரை பகுதியைச் சேர்ந்தவர் சூரியப்பிரியா (27). இவர் சில திரைப்படங்களில் துணை நடிகையாக நடித்துள்ளார். கடந்த சில நாள்களுக்கு முன்பு சூரியப்பிரியா கடலூர் மாவட்டம் சிதம்பரத்திற்கு வந்து தனது தோழிகள் மூவரை சந்தித்துள்ளார். இதையடுத்து, அவர்கள் நான்கு பேரும் காவலர்கள் போல் வேடமிட்டு பணம் பறிக்க முடிவு செய்தனர்.

அதனைத் தொடர்ந்து, சூரியப்பிரியா காவல் உதவி ஆய்வாளர் வேடமணிந்து சிதம்பரத்தில் பல்வேறு இடங்களில் பணம் வசூல் செய்துள்ளார். இதுகுறித்து சிதம்பரம் துணைக் காவல் கண்காணிப்பாளர் கார்த்திகேயனுக்கு தெரியவந்ததையடுத்து போலி வேடமிட்டு பொதுமக்களிடம் பணம் பறிக்கும் கும்பலை பிடிக்க முடிவு செய்தனர்.

அதனைத் தொடர்ந்து காவல் துறையினர் நகரப் பகுதிகளில் தீவிரமாக கண்காணித்து வந்தனர். இன்று மாலை சூரியப்பிரியா காவல் உதவி ஆய்வாளர் வேடமிட்டு சிதம்பரத்தில் உலா வந்து கொண்டிருந்தார். அப்போது, அங்கு கண்காணிப்புப் பணியிலிருந்த சிதம்பரம் நகர காவல் துறையினர் சூர்யப்பிரியா, அவரது தோழிகள் மூன்று பேரையும் மடக்கி பிடித்து கைது செய்தனர்.

அதன்பின், அவர்களை காவல் நிலையம் அழைத்துச் சென்று விசாரணை நடத்தினர். சூரியப்பிரியா காவல் உதவி ஆய்வாளர் வேடமணிந்து எந்தெந்த பகுதிகளில் எவ்வளவு பணம் வசூலித்தார் என்பது குறித்து காவல் துறையினர் தீவிரமாக விசாரணை நடத்தி வருகின்றனர்.

இதையும் படிங்க: அரசு அலுவலர்கள் எனக் கூறி வியாபாரிகளிடம் வசூல் வேட்டை: இருவர் கைது!