திமுக தலைமையிலான கூட்டணியில் கடலூர் தொகுதி வேட்பாளராக போட்டியிடும் டி.ஆர்.வி.எஸ் ரமேஷை ஆதரித்து திராவிட கழகம் சார்பில் விருத்தாசலத்தில் பொதுக்கூட்டம் நடைபெற்றது. இக்கூட்டத்தில் திராவிடர் கழகத் தலைவர் கி. விரமணி கலந்துகொண்டு பரப்புரை மேற்கொண்டார்.
அப்போது பேசிய அவர், திமுக தலைமையிலான கூட்டணி தேர்தலுக்காக உருவாக்கப்பட்ட கூட்டணி அல்ல என்றும், பல ஆண்டுகளாக காவிரி நதிநீர் உரிமை மீட்பு போராட்டம், நீட் தேர்வு எதிர்ப்பு போராட்டம், பத்து சதவிகித இட ஒதுக்கீடுக்கு எதிரான சமூக நீதிப் போராட்டம் என மக்கள் பிரச்சனைகளை ஒன்று சேர்ந்து போராடிய கொள்கை வழியில் உருவானக் கூட்டணி எனவும் தெரிவித்தார்.
திமுக தேர்தல் அறிக்கையில் நீட் தேர்வு ரத்து செய்யப்படும் என அறிவித்துள்ளதாக குறிப்பிட்ட அவர், ராகுல்காந்தி தலைமையில் அமையப் போகிற மத்திய ஆட்சி நீட் தேர்வுக்கு முடிவுகட்டும் என்று கூறினார்.
திராவிட இயக்கத்தின் தாக்கம் இன்று தென்நாடு கடந்து வடமாநிலங்களிலும் பரவி வருவதாக குறிப்பிட்டார். இதன் எதிரொலியாகத்தான் ராகுல் காந்தி தென்னாட்டில் வந்து போட்டியிடுகிறார் என்றும் கூறினார்.
தமிழகத்தில் நிலவும் கொத்தடிமை ஆட்சியை அகற்ற வேண்டும் என்றும், மத்தியில் இருக்கும் மதவெறி பதவி வெறி பிடித்த மோடி ஆட்சி அகற்ற வேண்டும் என்பதில் மக்கள் தெளிவாக இருக்கிறார்கள் எனவும் வீரமணி பேசியுள்ளார்.
ஜனநாயகம் காப்பாற்றப்பட வேண்டும் பாசிசம் அழிக்கப்பட வேண்டும் என்றால் திமுக கூட்டணி வெற்றிபெற வேண்டும் என்றும் அவர் தெரிவித்தார்.
