முன்னாள் எம்எல்ஏ ஐயப்பனுக்கும் தொழில் துறை அமைச்சர் எம்.சி.சம்பத்துக்கும் இடையே கருத்து வேறுபாடு இருந்து வருகிறது. இதனால், முன்னாள் எம்எல்ஏ ஐயப்பன் அவரது ஆதரவாளர்களுடன் திமுகவில் இணைய உள்ளதாக கூறப்படுகிறது.
இந்நிலையில், ஐயப்பன் வீட்டில் வருமானவரித் துறையினர் மற்றும் தேர்தல் பறக்கும் படையினர் தீவிர சோதனை நடத்தியது பெரும் பரபரப்பை ஏற்படுத்தியது.
இதன்பின்னர், செய்தியாளர்களை சந்தித்து பேசிய முன்னாள் எம்எல்ஏ ஐயப்பன், 'இந்த சோதனையின் மூலம் இலவசமாக என்னுடைய பெயர், படம், செய்தி நாளை வரை சமூக வலைதளங்களில் வைரலாகும். இந்த பொய்யான தகவலை அளித்த நண்பருக்கு என்னுடைய மனமார்ந்த நன்றி. நான் உண்மையாக உழைக்கிறவன், எங்கிருந்தாலும் மற்றவர்களை உயர்த்த வேண்டும் என நினைக்கிறேன். யாருக்கும் துரோகம் இழைத்ததில்லை.
ஆனால் எனக்கு துரோகம் இழைக்கும் எண்ணத்தில் யாரோ கயவர்கள் பொய் புகார் அளித்து இந்த சோதனைக்கு உட்படுத்தி இருக்கின்றனர். என்னுடைய செல்வாக்கைக் குறைப்பதற்கான அச்சுறுத்தல் தான் இந்த சோதனை. இந்த சோதனை அமைச்சர் தூண்டுதல் அல்லது அவர்களுடைய ஆதரவாளர்கள் மூலமாக இருக்கலாம்' என அவர் கூறினார்.
