கோயம்புத்தூர்: பச்சாபாளையம் பகுதியைச் சேர்ந்த ஈஸ்வரமூர்த்தி. இவர் கடந்த ஜூன் 14-ஆம் தேதி இரவு அவிநாசி சாலையில் உள்ள தனியார் ஹோட்டலுக்கு உணவருந்த சென்று உள்ளார். அப்போது அவர் அவரது காரில் 30 லட்சம் ரூபாய் பணத்தை வைத்து விட்டு சென்று உள்ளார். உணவருந்தி விட்டு திரும்பி வந்து பார்க்கும் பொழுது கார் கண்ணாடி உடைக்கப்பட்டு அதில் வைக்கப்பட்டிருந்த 30 லட்சம் ரூபாய் பணம் திருடு போயிருந்தது.
இதனால் அதிர்ச்சி அடைந்த ஈஸ்வரமூர்த்தி, இந்த சம்பவம் குறித்து பீளமேடு காவல் நிலையத்தில் புகார் அளித்து உள்ளார். அதனைத் தொடர்ந்து மாநகர காவல் ஆணையாளர் பாலகிருஷ்ணன் உத்தரவின் பேரில் உதவி ஆணையர் பார்த்திபன் தலைமையில் காவல் ஆய்வாளர்கள் கணேஷ் குமார், மரியமுத்து, வினோத் குமார், செந்தில் குமார் மற்றும் 15 ஆய்வாளர்கள் அடங்கிய 4 தனிப்படைகள் விசாரணை மேற்கொண்டன.
அப்பகுதியில் உள்ள சிசிடிவி கேமராக்களில் பதிவான காட்சிகள் உட்பட பல்வேறு தகவலின் அடிப்படையில் விசாரணை மேற்கொள்ளப்பட்டதைத் தொடர்ந்து இந்த கொள்ளை சம்பவத்தில் ஈடுப்பட்ட ராஜேஷ் குமார் (வயது 33) என்பவர் கைது செய்யப்பட்டுள்ளார். ஈரோடு மாவட்டத்தைச் சேர்ந்த இவர் தற்போது கோவையில் வசித்து வருகிறார். இவரிடமிருந்து ரூபாய் 24 லட்சம் ரூபாய் கைப்பற்றப்பட்ட நிலையில் கொள்ளை சம்பவத்திற்கு பயன்படுத்திய காரும் கைப்பற்றப்பட்டது.
இச்சம்பவம் குறித்த செய்தியாளர்கள் சந்திப்பு பீளமேடு காவல் நிலையத்தில் நடைபெற்றது. அப்போது செய்தியாளர்களை சந்தித்த காவல் உதவி ஆணையர் பார்த்திபன், "ஈஸ்வரமூர்த்தி அளித்த புகாரின் அடிப்படையில் விசாரணை மேற்கொண்டதில் ஈரோடு மாவட்டத்தை சேர்ந்த ராஜேஷ் குமார் என்பவர் கைது செய்யப்பட்டுள்ளார். அவரிடமிருந்து 24 லட்சம் ரூபாய் மற்றும் கார் கைப்பற்றப்பட்டு உள்ளது.
கொள்ளை அடித்த 30 லட்ச ரூபாயில் ஆறு லட்சம் ரூபாய்க்கு இதரப் பொருட்களை வாங்கிவிட்ட நிலையில் அப்பொருட்களை மீட்பதற்கான நடவடிக்கைகள் மேற்கொள்ளப்பட்டு வருகிறது. 24 மணி நேரத்தில் சுமார் 400யிலிருந்து 500 சிசிடிவி கேமராக்கள் ஆய்வு செய்யப்பட்டன. ஈஸ்வரமூர்த்தி நிறுத்தி இருந்த கார் மறைவான பகுதியில் நிறுத்தப்பட்டிருந்ததால் எளிதாக பணம் திருடப்பட்டு உள்ளது.
காரில் வந்த ராஜேஷ் குமார் கொள்ளை சம்பவத்தில் ஈடுபட்டுள்ளார். ராஜேஷ் குமார் ஓட்டுநராக பணியாற்றி வருகிறார். அவருடைய சொந்த காரில் வந்து இந்த சம்பவத்தில் ஈடுபட்டுள்ளார். அவர் மீது வேறு எந்த வழக்கும் இல்லை. எளிதாக பணம் சம்பாதிக்கும் நோக்கில் திருட்டு சம்பவத்தில் ஈடுபட்டுள்ளார். திருடிய 30 லட்ச ரூபாயில், ஆறு லட்சம் ரூபாயில் சிறிது பணத்தை அவரது மனைவியின் வங்கிக் கணக்கில் செலுத்தி விட்டார்.
மேலும், காருக்கு டயர் மாற்றி உள்ளார். நாள்தோறும் சுவையான உணவுகளை உண்டு வந்துள்ளார். ஈஸ்வர மூர்த்தி வாங்கிய பொருட்களைக் கொண்டு பணத்தை மீட்கும் முயற்சியில் ஈடுபட்டு வருகிறோம். வணிக வளாகங்கள், கடைகளுக்கு செல்வோர் பணத்தை காரில் வைத்து விட வேண்டாம். பொதுமக்கள் எச்சரிக்கையுடன் இருக்க வேண்டும்” என கேட்டுக்கொண்டார்.
இந்த நிகழ்வில் பீளமேடு காவல் நிலைய சட்டம் ஒழுங்கு ஆய்வாளர் கணேஷ் குமார், குற்றப் புலனாய்வு ஆய்வாளர் மரியமுத்து, சிங்காநல்லூர் காவல் நிலைய ஆய்வாளர் வினோத் குமார், சரவணம்பட்டி ஆய்வாளர் செந்தில் குமார் ஆகியோர் கலந்து கொண்டனர்.
இதையும் படிங்க: Dindigul:ஜவுளி கடையில் கைவரிசை காட்டிய கொள்ளையர்கள்.. போலீசார் வலைவீச்சு
