ஆம்புலன்ஸ் ஊழியர்கள் போராடியும் இளைஞரைக் காப்பாற்ற முடியாத சோகம்

கோவை: விபத்தில் காயமடைந்து உயிருக்குப் போராடிய இளைஞரை தமுமுக ஆம்புலன்ஸ் ஊழியர்களும் பொதுமக்களும் காப்பற்ற கடுமையாக முயற்சி செய்தும், அவர் உயிரிழந்தார்.

கோவை குனியமுத்தூர் பகுதியைச் சேர்ந்தவர்கள் பாட்சா, நசீர் ஆகியோர். இவர்கள் இருவரும் நேற்று கேரளாவிற்கு இருசக்கர வாகனத்தில் சென்றனர். அப்போது பாலக்காடு அருகே சென்றபோது எதிர் திசையில் வந்த கார் நிலைதடுமாறி இருசக்கர வாகனத்தில் மோதியது. இதில், இளைஞர் பாட்சா சம்பவ இடத்திலேயே உயிரிழந்தார்.

உயிருக்குப் போராடிக்கொண்டிருந்த நசீரை அங்கிருந்தவர்கள் கோவையைச் சேர்ந்த தமுமுக ஆம்புலன்ஸ் மூலம் கோவை அரசு மருத்துவமனைக்கு 1 மணி நேரத்தில் கொண்டு சென்றனர். அங்கு உடனடியாக தீவிர சிகிச்சைப் பிரிவில் அனுமதிக்கப்பட்ட நசீர் சிகிச்சை பலனின்றி பரிதாபமாக உயிரிழந்தார்.

பொதுவாக கோவையிலிருந்து பாலக்காடு செல்ல ஒரு மணி நேரத்திற்கும் மேலாகும். தற்போது பாலக்காடு செல்லும் வழியான உக்கடம், அத்துப்பாலம் போன்ற முக்கிய பகுதிகளில் பாலம் கட்டும் பணி நடைபெற்றுவருவதால், இரண்டு மணி நேரத்திற்கு மேலாகும். இந்த நிலையிலும் இளைஞர்கள் விபத்து குறித்து தமுமுக ஆம்புலன்ஸ்க்கு தெரிவிக்கப்பட்ட உடனே, அவர்கள் விரைந்து இளைஞரை காப்பற்றியாக வேண்டும் என்று விரைந்து சென்றாலும், இளைஞரின் உயிரை அவர்களால் காப்பாற்ற முடியாமல் போனது.