கோயம்புத்தூர்: தக்காளிக்கு உரிய விலை நிர்ணயம் செய்யக்கோரியும், தக்காளி விவசாயிகளை பாதுகாக்க குளிர் பதன சேமிப்புக் கிடங்கு அமைக்க வலியுறுத்தியும் தமிழ்நாடு விவசாயிகள் சங்கம் சார்பில் மாவட்ட ஆட்சியரிடம் மனு அளிக்கப்பட்டது.
முன்னதாக தமிழ்நாடு விவசாயிகள் சங்கத்தின் மாவட்ட தலைவர் சு.பழனிசாமி உள்ளிட்ட விவசாயிகள் ஆட்சியர் அலுவலகம் முன்பு மழையால் சேதமடைந்த தக்காளி செடிகளையும், அழுகிய தக்காளிகளையும் கொட்டினர். பின்னர் அவர்கள் கொண்டு வந்த தக்காளிகளை பொதுமக்களுக்கு குறைந்த விலையில் வழங்கினர்.
இது குறித்து சு.பழனிசாமி கூறுகையில், தமிழ்நாட்டில் மூன்றாவது இடமாக கோவையில் தக்காளி மார்க்கெட் உள்ளது. தக்காளியை விவசாயிகள் விற்பனைக்கு கொண்டு வரும்போது கிலோ ஆறு முதல் ஏழு ரூபாய் வரை கேட்கின்றனர். கடையில் 25 முதல் 30 ரூபாய் வரை விற்பனை செய்கின்றனர். இதனால் விவசாயிகளுக்கு உரிய கூலி கிடைப்பதில்லை என்றார்.
கடந்த வாரம் 60 முதல் 70 ரூபாய் வரை தக்காளி விற்ற நிலையில் விவசாயிகளுக்கு கிலோவுக்கு ஆறு ரூபாய் மட்டுமே கிடைத்தது. தக்காளி விவசாயிகளுக்கு குறைந்தபட்ச தொகையை நிர்ணயம் செய்ய வேண்டும் என்றார்.
இதனை வலியுறுத்தி மாவட்ட ஆட்சியர் அலுவலகம் முன்பு குறைந்த விலைக்கு தக்காளிகளை மஞ்சப்பை மூலம் வழங்கப்பட்டது. விவசாயிகளுக்கு பாதிப்பு ஏற்படும் போது வேளாண் நலத்துறை அதிகாரிகளும் கணக்கில் எடுக்க வேண்டும் எனவும் விலை ஏறுகின்ற போது அதை தடுக்கும் முறையிலும் அதிகாரிகள் ஈடுபட வேண்டும் என்றும் அவர் கோரிக்கை விடுத்தார்.
விவசாயிகள் பிரச்சனை தீர்ப்பதற்கு கள ஆய்வு நடத்த வேண்டும் என தெரிவித்த அவர் விவசாயிகளை பாதுகாக்க அரசு உரிய நடவடிக்கை எடுக்க வேண்டும் என்று சு.பழனிசாமி வலியுறுத்தினார்.
இதையும் படிங்க: போலீசார் கட்டுப்பாடுக்குள் வந்தது கோவை மாவட்ட ஆட்சியர் அலுவலகம்...
