கோவை மாவட்டம், பொள்ளாச்சி அருகேயுள்ள வக்கம்பாளையம் பகுதியைச் சேர்ந்தவர் சசிக்குமார். இவரது மகள் லாவண்யா. இவருக்கு அதேபகுதியைச் சேர்ந்த தர்மராஜ் என்பவருடன் திருமணம் ஆன நிலையில், சமீபத்தில் கர்ப்பமாக இருந்திருக்கிறார். இந்நிலையில் தந்தை சசிக்குமாரும், லாவண்யாவும் கடந்த மார்ச் 28ஆம் தேதி காலையில் அத்தியாவசியப் பொருள்கள் வாங்க கடைக்குச் சென்றுள்ளனர்.
அப்போது, அதிமுக ஊராட்சித் தலைவர் ரவி என்பவர், 144 தடை உத்தரவு அமலில் உள்ள நிலையில், வெளியே வந்ததற்கு அவர்களை தகாத வார்த்தைகளில் திட்டியதாகக் கூறப்படுகிறது. இது குறித்து லாவண்யாவும் சசிக்குமாரும் ஆனைமலை காவல் நிலையத்தில் புகார் அளித்துள்ளனர்.
இதனால் ஆத்திரமடைந்த அதிமுக ஊராட்சித் தலைவர் ரவி, மதுபோதையில் அவரது நண்பர்கள் ஆறு பேருடன் கர்ப்பிணிப் பெண்ணின் வீட்டிற்குச் சென்று லாவண்யா, கணவர் தர்மராஜ், தந்தை சசிக்குமார் ஆகியோரை தாக்கியதாகக் கூறப்படுகிறது. அதில், லாவண்யாவின் கருக்கலைந்து மேல் சிகிச்சைக்காக பொள்ளாச்சி அரசு மருத்துவமனையில் அனுமதிக்கப்பட்டிருந்தார்.
இந்நிலையில், இன்று பொள்ளாச்சி சார் ஆட்சியர் அலுவலகத்தில் லாவண்யா தனது குடும்பத்தினருடன் வந்து, சார் ஆட்சியர் வைத்தியநாதனிடம் மனு அளித்தார். இது குறித்து செய்தியாளர்களைச் சந்தித்த லாவண்யா கூறுகையில், "அதிமுக ஊராட்சித் தலைவர் ரவி, என்னைத் தாக்கியதில் எனது கருக்கலைந்தது.
இது தொடர்பாக காவல் நிலையத்தில் புகார் அளித்தும் காவல் துறையினர் உரிய நடவடிக்கை எடுக்கவில்லை. காவல்துறை ஆளும் அதிமுகவினருக்கே சாதகமாக செயல்படுகின்றனர். காவல் துறையின் மீது இருந்த நம்பிக்கையை இழந்ததால், தற்போது சார் ஆட்சியரிடம் மனு அளித்துள்ளேன். அவராவது தக்க நடவடிக்கை எடுப்பார் என்று கருதுகிறேன்" என்றார்.
இதையும் படிங்க:சிறுமியை திருமணம் செய்த இளைஞர்: 2 ஆண்டுகளுக்குப் பிறகு கைது!
