விழுப்புரம் மாவட்டம் விக்கிரவாண்டி தொகுதி சட்டப்பேரவை உறுப்பினராக இருந்தவர் ராதாமணி. திமுகவைச் சேர்ந்தவரான இவர், கடந்த ஜூன் மாதம் உடல்நலக் குறைவால் காலமானார்.
இதையடுத்து, விக்கிரவாண்டி தொகுதி காலியாக உள்ளதாக தேர்தல் ஆணையம் அதிகாரப்பூர்வமாக அறிவித்தது. இதைத்தொடர்ந்து, தமிழ்நாட்டில் தற்போது காலியாக உள்ள விழுப்புரம் மாவட்டம் விக்கிரவாண்டி மற்றும் நெல்லை மாவட்டம் நாங்குநேரி சட்டப்பேரவைத் தொகுதிகளுக்கு அக்டோபர் 21ஆம் தேதி இடைத்தேர்தல் நடத்தப்படும் என தேர்தல் ஆணையம் அறிவித்துள்ளது.
இந்நிலையில், விக்கிரவாண்டி தொகுதியில் திமுக சார்பில் போட்டியிடும் வேட்பாளரைத் தேர்வு செய்வதற்கான நேர்காணல் அக்கட்சியின் தலைமை அலுவலகமான அண்ணா அறிவாலயத்தில் இன்று காலை நடைபெற்றது.
அதில், விழுப்புரம் மாவட்ட திமுக பொருளாளர் புகழேந்தி என்பவர் போட்டியிடுவார் என்று முடிவு செய்யப்பட்டிருப்பதாக அக்கட்சியின் தலைமை அறிவித்துள்ளது. இவர் மூன்று முறை விக்கிரவாண்டி ஒன்றியத்தின் திமுக செயலாளராக இருந்துள்ளார் என்பது குறிப்பிடத்தக்கது.
