'டிஎன்பிஎஸ்சி முறைகேடு தொடர்பான தகவல்களை சிபிசிஐடிக்கு தர தயார்'

சென்னை: தமிழ்நாடு அரசுப் பணியாளர் தேர்வாணைய தேர்வுகளில் நடைபெற்ற முறைகேடுகள் குறித்த சந்தேகங்கள் தொடர்பான அனைத்து ஆவணங்களையும் சிபிசிஐடிக்கு தருவதற்கு தயாராக உள்ளோம் என அதன் அலுவலர்கள் தெரிவித்துள்ளனர்.

குரூப்-4 தேர்வில் நடைபெற்ற முறைகேடு தொடர்பாக தமிழ்நாடு அரசுப் பணியாளர் தேர்வாணையம் விசாரணை மேற்கொண்டது. தேர்வில் முதல் 99 இடங்களைப் பெற்றவர்கள் முறைகேட்டில் ஈடுபட்டு தேர்ச்சிப் பெற்றதைக் கண்டறிந்தனர். தொடர்ந்து அந்த வழக்கினை விசாரிக்க சிபிசிஐடியிடம் 23ஆம் தேதி புகார் அளித்தனர். தமிழ்நாடு அரசுப் பணியாளர் தேர்வாணையம் அளித்த புகாரின் அடிப்படையில் விசாரணையை சிபிசிஐடி அலுவலர்கள் தீவிரப்படுத்தியுள்ளனர்.

சிபிசிஐடி அலுவலர்களின் விசாரணையில், தற்போதுவரை 12 பேர் கைதுசெய்யப்பட்டுள்ளனர். குரூப்-4 முறைகேட்டில் ஈடுபட்ட தேர்வு எழுதியவர்கள் 99 பேரையும் கைதுசெய்ய சிபிசிஐடி தீவிரம் காட்டிவருகின்றது.

இந்த நிலையில், 2017ஆம் ஆண்டு நடைபெற்ற குரூப்-2 ஏ தேர்வில் ராமேஸ்வரம் மையத்திலிருந்து தேர்வு எழுதியவர்கள் முதல் 100 இடங்களுக்குள் தேர்ச்சி பெற்றுள்ளனர். இந்தத் தேர்வில் முறைகேடு செய்த எரிசக்தி துறையில் பணியாற்றிவந்த திருமுருகன் இதில் இடம்பெற்றுள்ளார். எனவே இது குறித்தும் விசாரணை மேற்கொள்ள வேண்டும் எனத் தேர்வர்கள் கோரிக்கைவைத்தனர்.

சிபிசிஐடி அலுவர்கள் விசாரணையை தீவிரப்படுத்தியுள்ளதால், தமிழ்நாடு அரசுப் பணியாளர் தேர்வாணையத்தில் இடைத்தரகர்கள் உதவியுடன் தேர்வில் வெற்றிபெற்றவர்களின் பட்டியல் அதிகரிக்கும் எனத் தெரிகிறது. அதே நேரத்தில் குரூப்-4 தேர்வில் கூறிய தகவல்கள் மட்டுமே தற்பொழுது தமிழ்நாடு அரசுப் பணியாளர் தேர்வாணையத்தால் சிபிசிஐடி-யிடம் அளிக்கப்பட்டுள்ளது.

தமிழ்நாடு அரசு பணியாளர் தேர்வாணையம்

சிபிசிஐடி அலுவலர்கள் குரூப்-2 உள்பட எந்தத் தேர்வில் முறைகேடு நடைபெற்றது குறித்து விவரங்களை கேட்டாலும், அதனை உடனடியாக தமிழ்நாடு அரசுப் பணியாளர் தேர்வாணையம் அளிக்கத் தயாராக உள்ளது என அதன் அலுவலர்கள் தெரிவித்துள்ளனர்.

இதையும் படிங்க: டிஎன்பிஎஸ்சி குரூப்-4 தேர்வு முறைகேடு: சிபிசிஐடி விசாரணை