சென்னை: மிக்ஜாம் புயலால், தமிழகத்தில் கடந்த டிசம்பர் மாதம் கனமழை கொட்டி தீர்த்தது. குறிப்பாகச் சென்னை, காஞ்சிபுரம், திருவள்ளூர், செங்கல்பட்டு ஆகிய மாவட்டங்களில் மிக்ஜாம் புயல் காரணமாக அதிக கன மழைப் பதிவானது. இதனால் சென்னையில் பல பகுதிகள் மழை வெள்ளத்தால் கடுமையாகப் பாதிக்கப்பட்டது.
இந்நிலையில் மிக்ஜாம் புயலால் பாதிக்கப்பட்ட சென்னை, செங்கல்பட்டு, திருவள்ளூர், காஞ்சிபுரம் ஆகிய 4 மாவட்டங்களுக்கு ரூபாய் 6 ஆயிரம் வெள்ள நிவாரணம் வழங்கப்படும் என தமிழக அரசு அறிவித்திருந்தது. மேலும் இந்தத் தொகை வங்கிக் கணக்கில் செலுத்தப்படாமல் நியாய விலை கடைகள் மூலமாக நேரடியாகப் பொதுமக்களுக்கு வழங்கப்பட்டு வருகிறது.
இந்நிலையில் சென்னை செங்கல்பட்டு திருவள்ளூர் காஞ்சிபுரம் மாவட்டங்களைத் தொடர்ந்து தென் தமிழகத்தில் பாதிக்கப்பட்ட மக்களுக்கும் நிவாரணம் வழங்கும் பணி நடைபெற்று வருகிறது. குறிப்பாக, மழை வெள்ளத்தால் பாதிக்கப்பட்டு குடும்ப அட்டை இல்லாதவர்களுக்கு விண்ணப்ப பூர்த்தி செய்து அதன் அடிப்படையில் ஆய்வு மேற்கொள்ளப்பட்டு நிவாரணம் வழங்கப்படும் என தமிழக அரசு அறிவித்திருந்தது.
இந்நிலையில் அதன் அடிப்படையில் தற்போது இந்த ஆய்வு செய்யும் பணியானது தற்பொழுது தொடங்கி இருக்கிறது. குறிப்பாக இந்த விண்ணப்பங்கள் அனைத்தும் செயலி மூலமும் நியாய விலை கடைகளில் கொடுக்கப்படும் படிவங்கள் மூலமும் பூர்த்தி செய்யப்பட்டுச் சமர்ப்பிக்கப்பட்டது. நிவாரண தொகைக்காக மொத்தம் 5.5 லட்சம் மக்கள் விண்ணப்பித்திருந்தது குறிப்பிடத்தக்கது.
மழை வெள்ளத்தால் பாதிக்கப்பட்ட மக்களுக்கு இதற்கு முன்னர் குறுஞ்செய்தி மூலம் நிவாரணம் வழங்குவது தெரிவிக்கப்படும் என அறிவிக்கப்பட்டிருந்தது. அதே வழிமுறையில் தான் தற்போதும் இந்த படிவம் மூலமாகத் தேர்ந்தெடுக்கப்படுபவர்களுக்கும் தெரிவிக்கப்படும் என தெரிவிக்கப்பட்டுள்ளது.
இதையும் படிங்க: வெள்ள நிவாரண நிதி: தமிழக அனைத்து கட்சி எம்.பி-கள் அமிஷ்சாவை சந்திக்க உள்ளதாக மு.க.ஸ்டாலின் அறிவிப்பு
