செல்ஃபி மோகத்தால் அதிகரிக்கும் உயிரிழப்புகள்; எச்சரிக்கை விடுத்த ரயில்வே துறை!

ரயில் தண்டவாளங்களில் நாளுக்கு நாள் அதிகரிக்கும் உயிரிழப்புகளை கட்டுப்படுத்தும் வகையில் தண்டவாளங்களில் நின்று செல்ஃபி எடுப்பவர்கள் மீது கடும் நடவடிக்கை எடுக்கப்படும் என ரயில்வே காவல் துறையினர் அறிவுறுத்தியுள்ளனர்.

சென்னை: ரயில்வே தண்டவாளம் அருகே, அவ்வப்போது இளைஞர்கள் விளம்பர மோகத்தால் செல்ஃபி எடுக்கும்போது கவணக்குறைவால் அதிகளவில் இறப்புகள் நேரிடுகிறது. இதனால் இனி ரயில்வே தண்டவாளத்தில் செல்ஃபி எடுத்தால் கடும் நடவடிக்கை எடுக்கப்படும் என ரயில்வே இருப்புப்பாதை அதிகாரிகள் எச்சரிக்கை விடுத்துள்ளனர். திருநெல்வேலி - பிளாஸ்பூர் விரைவு ரயில் வஞ்சிபாளையம் மற்றும் திருப்பூர் ரயில் நிலையங்களுக்கு இடையே வேகமாக சென்றுகொண்டிருந்தபோது பாண்டியன் (23) மற்றும் விஜய் (24) ஆகிய இருவரும் மதுபோதையில் தண்டவாளத்தில் நின்று செல்ஃபி எடுத்துக்கொண்டிருந்தனர். அப்போது ரயிலில் அடிபட்டு இருவரும் சம்பவ இடத்திலேயே உயிரிழந்தனர்.

இது தொடர்பாக திருப்பூர் இருப்புப்பாதை காவல் நிலையத்தில் காவல் துறையினர் வழக்குப்பதிவு செய்து விசாரனை மேற்கொண்டு வருகின்றனர். மேலும், இதே போன்று கடந்த 13 ஆம் தேதி காரைக்கால் - பெங்களூர் விரைவு ரயில், வாழப்பாடி மற்றும் ஏத்தாப்பூர் ரயில் நிலையங்களுக்கு இடையே ரயில் சென்றுகொண்டிருந்தபோது காங்கேயன் (22) என்பவர் தனது நண்பர்களுடன் தண்டவாளம் அருகே ரயில் முன் நின்று செல்ஃபி எடுக்க முயன்றார். அப்போது ரயிலில் அடிபட்டு சம்பவ இடத்திலேயே உயிரிழந்தார். இதில் அவருடன் செல்ஃபி எடுக்கச் சென்ற மற்றொரு நபரும் பலத்த காயம் அடைந்தார். இது தொடர்பாக சேலம் இருப்புப்பாதை காவல் நிலையத்தில் வழக்குப்பதிவு செய்யப்பட்டு விசாரணைக்கு உட்படுத்தப்பட்டது.

இந்த நிலையில் தண்டவாளங்கள் ரயில்கள் செல்வதற்கு மட்டுமே என்றும் தண்டவாளத்தில் விதிமுறைகளை மீறி கண்டபடி செல்வது சட்டப்படி (147 Railway Act) குற்றமாகும். தண்டவாளத்தில் நடந்து செல்வது, விளையாடுவது, விளம்பர மோகத்தில் செல்ஃபி எடுப்பது போன்ற செயல்களால் பலர் தங்களது விலைமதிப்பற்ற உயிர்களை இழக்க நேரிடுவதை தடுக்க வேண்டும் என ரயில்வே இருப்புப்பாதை காவல் துறையினர் எச்சரித்துள்ளனர். மேலும் தண்டவாளம் அருகே நின்று செல்ஃபி எடுப்பவர்கள் மீது கடும் நடவடிக்கை எடுக்கப்படும் என ரயில்வே இருப்புப்பாதை காவல் துறையினர் தெரிவித்துள்ளனர்.

இதனைத் தொடர்ந்து ரயில் பயணிகள் மற்றும் பொதுமக்கள், இருப்புப்பாதை காவல் துறைக்கு முழு ஒத்துழைப்பு வழங்கி காவல் துறையின் அறிவுரைகளை தவறாமல் கடைபிடித்து தங்களது விலை மதிப்பில்லாத உயிரை காத்துகொள்வதற்கும் தங்களின் குடம்ப நலனை கருத்தில் கொண்டு சமூக பொறுப்புடன் செயலாற்றுமாறும், இருப்புப்பாதை காவல் துறையினர் பொதுமக்களிடம் வேண்டுகோள் விடுத்துள்ளனர். மேலும், ரயில் பயணிகளின் முழுநேர பாதுகாப்பு சம்மந்தமான புகார்களுக்கு, இருப்புப்பாதை காவல் துறையினர் உதவி மைய நம்பர் 1512, மற்றும் வாட்ஸ்அப் எண் 99625-00500 தொடர்புகொள்ளுமாறும் பயனிகளுக்கு அறிவுறுத்தியுள்ளனர்.

இதையும் படிங்க: செந்தில் பாலாஜி மீதான வேலை மோசடி வழக்கு- போக்குவரத்துத்துறை ஊழியர்களிடம் தீவிர விசாரணை