சென்னை: மாநகராட்சிக்கு உட்பட்ட பகுதிகளில், போக்குவரத்திற்கு இடையூறாக நீண்ட நாட்களாக நிறுத்தி வைக்கப்பட்டுள்ள கேட்பாரற்ற வாகனங்களை அதன் உரிமையாளர்கள் உடனடியாக அப்புறப்படுத்தவில்லை என்றால் காவல் துறை மூலம் பறிமுதல் செய்யப்பட்டு ஏலத்தில் விடப்படும் என மாநகராட்சி உத்தரவிட்டுள்ளது.
இதுகுறித்து மாநகராட்சி விடுத்துள்ள அறிவிப்பில், "பெருநகர சென்னை மாநகராட்சிப் பகுதிகளில் தெருவோரங்கள் மற்றும் சாலைகளில் கைவிடப்பட்ட வாகனங்கள், (Abandoned Vehicles) பொதுமக்களுக்கு பெரும் இடையூறாகவும், போக்குவரத்து நெரிசலுக்கும் வழிவகுக்கிறது. மேலும், அப்பகுதி குப்பைகளை கொட்டும் பகுதிகளாக உருவாவதால், சாலைகளை முறையாக சுத்தம் செய்ய இயலாத நிலையும் ஏற்படுகிறது. இதனால், கைவிடப்பட்ட வாகனங்களின் எண்ணிக்கையை கணக்கெடுத்து அடையாளம் கண்டு அவற்றினை அகற்ற தகுந்த நடவடிக்கை, மாநகராட்சி சார்பில் எடுக்கப்பட இருக்கிறது.
இதன், முதற்கட்டமாக பெருநகர சென்னை மாநகராட்சிப் பகுதிகளில், போக்குவரத்திற்கு இடையூறாக நீண்ட நாட்களாக சாலைகள் மற்றும் பொது இடங்களில் கேட்பார் அற்று நிறுத்தி வைக்கப்பட்டுள்ள இருசக்கர வாகனங்கள், 3 சக்கர வாகனங்கள், 4 சக்கர வாகனங்கள் மற்றும் கனரக வாகனங்களை பெருநகர சென்னை மாநகராட்சி மற்றும் பெருநகர சென்னை காவல்துறை அலுவலர்களால் உடனடியாக அகற்றிட நடவடிக்கை மேற்கொள்ளப்படவுள்ளது.
எனவே, சாலையோரங்கள், நடைபாதைகள், தெருக்கள் மற்றும் பொது இடங்களில் நீண்ட நாட்களாக நிறுத்தி வைக்கப்பட்டுள்ள வாகனங்களின் உரிமையாளர்கள், இன்னும் 15 நாட்களுக்குள் தாமாகவே முன்வந்து உடனடியாக வாகனங்களை அப்புறப்படுத்த வேண்டும் என மாநகராட்சி வேண்டுகோள் விடுத்துள்ளது.
மேலும், வாகனத்தின் உரிமையாளர்கள் தாமாக முன்வந்து வாகனங்களை அகற்றாத பட்சத்தில், அந்த வாகனங்களின் மீது சட்ட ரீதியான நடவடிக்கை மேற்கொள்ளப்பட்டு, அவை காவல்துறை அலுவலர்களின் ஒத்துழைப்புடன் மாநகராட்சியால் கண்டறியப்பட்டுள்ள பொது இடத்தில் வாகனங்கள் கொண்டு வைக்கப்படும்.
அவ்வாறு அப்புறப்படுத்தப்பட்ட வாகனங்களின் விவரங்கள் பெருநகர சென்னை மாநகராட்சியின் இணையதளத்திலும், செய்தித்தாளிலும் வெளியிடப்படும். மேலும், வாகனத்தின் விவரங்களை தொடர்புடைய வாகனங்களின் உரிமையாளர்கள் பார்வையிட்டு, சம்பந்தப்பட்ட பெருநகர சென்னை மாநகராட்சியின் மண்டல அலுவலர்களை 15 நாட்களுக்குள் அணுகி உரிய விவரங்கள் மற்றும் ஆவணங்களை சமர்ப்பித்திட வேண்டும்.
அவ்வாறு உரிமை கோரப்படாத வாகனங்கள், குறிப்பிட்ட நாட்களுக்குப் பிறகு உரிய சட்ட நடவடிக்கைகளைப் பின்பற்றி பொது ஏலத்தில் விடப்படும் என மாநகராட்சி எச்சரிக்கை விடுத்து உள்ளது. அதுமட்டும் இன்றி சென்னை மாநகராட்சிப் பகுதியில் போக்குவரத்து மற்றும் பொதுமக்களுக்கு இடையூறாக உள்ள வாகனங்களை, அகற்றுவதன் மூலம் பொதுமக்களுக்கு இடையூறற்ற போக்குவரத்து நிறந்த பகுதியாகவும், குப்பைகளற்ற சிறந்த தூய்மைப் பகுதியாகவும் திகழ்ந்திட வழிவகை ஏற்படும்" எனவும் தெரிவித்துள்ளது.
இதையும் படிங்க: பாஜக 2ம் கட்ட வேட்பாளர் லிஸ்ட் - ஹிஜாப் பிரச்னையைக் கிளப்பியவர் உட்பட 7 எம்எல்ஏக்களுக்கு வாய்ப்பு மறுப்பு
