வட்டார கல்வி அலுவலர்களுக்கான கணினி வழித்தேர்வு வரும் 14 ,15, 16 ஆகிய தேதிகளில் காலை மற்றும் மாலை ஆகிய இரு வேலைகளிலும் தமிழ்நாடு முழுவதும் 57 தேர்வு மையங்களில் நடைபெறவுள்ளது. இந்தத் தேர்வினை 24 ஆயிரத்து 420 ஆண் தேர்வர்கள், 40 ஆயிரத்து 266 பெண் தேர்வர்கள், 22 மூன்றாம் பாலினத்தைச் சேர்ந்த தேர்வர்கள் என சுமார் 64 ஆயிரத்து 710 தேர்வர்கள் எழுதவுள்ளனர்.
இந்தத் தேர்விற்கான அறிவிப்பில் வெளியிடப்பட்டது போல கணினி மூலம் மட்டுமே தேர்வு நடத்தப்படும். இந்தத் தேர்வுப் பணியினை மேற்கொள்ள கண்காணிப்பு அலுவலர்களாக இயக்குனர்கள், இணை இயக்குனர்கள், துணை இயக்குனர்கள் நியமிக்கப்பட்டுள்ளனர். மேலும், 30 முதன்மை கல்வி அலுவலர்கள், 57 மாவட்ட கல்வி அலுவலர்கள், 57 மூத்த தலைமை ஆசிரியர்கள், 57 கம்ப்யூட்டர் ஆசிரியர்கள் பணிபுரிய உள்ளனர்.
இந்நிலையில் ஆசிரியர் தேர்வு வாரியம் வெளியிட்டுள்ள ஹால் டிக்கெட்டில் தேர்வர்களுக்கான விதிமுறைகளை குறிப்பிட்டுள்ளது. அதில் “ஆன்லைன் மூலம் மட்டும் பதிவிறக்கம் செய்யப்படும் தேர்வுக்கூட நுழைவுச்சீட்டில் தவறுகள் இருந்தால், உடனடியாக ஆசிரியர் தேர்வு வாரியத்தின் உறுப்பினர், செயலாளரை தொடர்புக் கொண்டால் நடவடிக்கை மேற்கொள்ளப்படும். தேர்வுக்கூட நுழைவுச்சீட்டு எந்தவிதமான வேலைவாய்ப்பிற்கும் உத்தரவாதமாகாது. தேர்வு நடைபெறும் மாவட்டம், தேர்வு மையம் உள்ளிட்டவை ஆசிரியர் தேர்வு வாரியத்தின் நடப்பு கொள்கையின் அடிப்படையில் ரேண்டம் முறையில் ரகசியமாக ஒதுக்கீடு செய்யப்பட்டு அளிக்கப்படும்.
எந்தக் காரணத்தைக் கொண்டும் ஒதுக்கீடு செய்யப்பட்ட தேர்வு மையம் மாற்றம் செய்து அளிக்கப்படாது. தேர்வு மையத்திற்குள் ஹால் டிக்கெட் இல்லாமல் யாரும் அனுமதிக்கப்படமாட்டார்கள். தேர்வர் சமீபத்தில் எடுக்கப்பட்ட பாஸ்போர்ட் சைஸ் புகைப்படம் (தேர்வுக்கூட நுழைவுச்சீட்டில் இருக்கும் புகைப்படத்துடன் கண்டிப்பாக ஒற்றுமையாக இருக்க வேண்டும்) . புகைப்படம் ஒற்றுமையாக இல்லாவிட்டால் தேர்வு மையத்திற்குள் அனுமதிக்கப்படமாட்டார்கள். வாக்களர் அட்டை, பாஸ்போர்ட், பான் கார்டு, ஓட்டுநர் உரிமம், ஆதார் கார்டு ஆகியவற்றில் தேர்வர்கள் ஏதேனும் ஒரு அடையாள அட்டையை கண்டிப்பாக எடுத்து வர வேண்டும்.
இந்த அடையாள அட்டையில் ஏதும் இல்லாவிட்டால், கண்டிப்பாக அனுமதிக்கப்படாமாட்டார்கள். காவல்துறையினர் அல்லது பாதுகாப்புப் பணியில் இருப்பவர்கள் சோதனை செய்த பின்னரே தேர்வு மையத்திற்குள் அனுமதிக்கப்படுவார்கள். தேர்வு மையத்தில் நகைக்கு அனுமதி கிடையாது. தேர்வு மையத்திற்குள் செல்போன், தகவல் தொடர்பு சாதனங்கள், மைக்ரோ போன் உள்ளிட்ட எந்தவிதமான மின்சாதனப் பொருட்கள், கால்குலேட்டர், பேஜர், டிஜிட்டல் டைரி, எலக்ட்ரானிக் பொருட்கள் உள்ளிட்டவைகள் கண்டிப்பாக அனுமதிக்கப்படாது. இந்த பொருட்களை தேர்வு மையத்தில் வைப்பதற்கும் அனுமதி கிடையாது.
இந்தப் பொருட்கள் தொலைந்தால் தேர்வு மையம் பொறுப்பாகாது. தேர்வு மையத்திற்குள் வளையல், கம்மல், கொலுசு உள்ளிட்ட நகைகள், வாட்ச், பெல்ட், ஷூ, ஹை கீல்ஸ் செருப்பு போன்றவை அணிந்து வரக் கூடாது. சாதாரண செருப்பு மட்டுமே அணிந்து வர வேண்டும். தேர்வு மையத்திற்குள் தேர்வுக்கூட நுழைவுச்சீட்டு மற்றும் அடையாள அட்டை தவிர வேறு எந்தவிதமான பொருட்களும் அனுமதிக்கப்படாது. பேப்பர், பேனாவிற்கும் அனுமதி கிடையாது. தேர்வு மையத்தில் தேர்வுகள் விடைகளை எழுதி பார்ப்பதற்கு தேவையான பேப்பர் மற்றும் பேனா அல்லது பென்சில் தேர்வு மையத்திலேயே வழங்கப்படும். அதனை பயன்படுத்தி விட்டு மீண்டும் தேர்வு மையத்தின் அதிகாரியிடம் அளிக்க வேண்டும், வெளியே எடுத்துச் செல்லக்கூடாது.
ஆன்லைன் கம்ப்யூட்டர் எழுத்துத் தேர்வு 150 மதிப்பெண்களுக்கு கொள்குறி வகையில் (ஆப்ஜெக்டிவ் டைப்) நடைபெறும். தேர்வு மையத்தில் தேர்வர்கள் வேறு தேர்வர்களுடன் பேசுவது போன்ற எந்தவிதமான செயலிலும் ஈடுப்படக் கூடாது. தேர்வு நடைபெறும் வரையில் அமைதியாக இருக்க வேண்டும். வெளிநபர்கள் யாருக்கும் தேர்வு மையத்திற்குள் அனுமதி கிடையாது. தேர்வு விதிமுறைகளை மீறும் தேர்வர்கள் தேர்வினை எழுதுவதில் இருந்து தகுதி நீக்கப்படுவார்கள். தேர்வர்கள் 3 மணி நேரம் மட்டுமே தேர்வு எழுதுவதற்கு அனுமதிக்கப்படுவார்கள் .
தேர்வில் தொழில் நுட்ப பிரச்னைகள் வந்தால், அதுகுறித்து ஆய்வு செய்து மறு தேர்வு வைக்கும் உரிமை ஆசிரியர் தேர்வு வாரியத்திற்கு உள்ளது. சட்டம் ஒழுங்கு பிரச்னை ஏற்பட்டாலோ அல்லது தொழில்நுட்பக் கோளாறு ஏற்பட்டாலோ தேர்வினை ரத்து செய்யவோ, ஒத்திவைக்கவோ ஆசிரியர் தேர்வு வாரியத்திற்கு அதிகாரம் உள்ளது.
தேர்வின்போது முறைகேட்டில் ஈடுப்பட்டாலோ அல்லது விதிமுறைகளை மீறினால் ஆசிரியர் தேர்வு வாரியம் என் மீது குற்றவியல் நடவடிக்கை எடுப்பதற்கும், தேர்வு எழுதுவதற்கு தடை விதிப்பதற்கும் நான் ஒப்புக்கொள்கிறேன். ஆசிரியர் தேர்வு வாரியத்தின் 24 கட்டளைகளை நான் ஏற்றுக் கொண்டு தேர்வு கூட நுழைவுச்சீட்டினை பெறுவதற்கு சம்மதிக்கிறேன் என உறுதி மொழி அளித்தால் மட்டுமே ஹால் டிக்கெட் பதிவிறக்கம் செய்ய முடியும் என்பது குறிப்பிடத்தக்கது.
இதையும் படிங்க...பொய்க் குற்றச்சாட்டைச் சுமத்துவதாக ஐபிஎஸ் மனைவி மீது புகார்
