தமிழ்நாட்டில் தற்போது உருமாறிய கரோனா கிருமிகளால் அதன் பரவக்கூடிய வேகம் அதிகரித்துவருவதாக மக்கள் நல்வாழ்வுத் துறை தெரிவித்துள்ளது. ஆனால் தற்போதுவரை மக்கள் நல்வாழ்வுத் துறை கரோனா தீநுண்மியின் இரண்டாவது அலை பரவிவருவதாக எந்தவித தகவலையும் தெரிவிக்கவில்லை.
இந்நிலையில் தமிழ்நாடு குழந்தைகள் உரிமைகள் பாதுகாப்பு ஆணையத்தின் தலைவர் சரஸ்வதி ரங்கசாமி பள்ளிக் கல்வித் துறைக்கு அனுப்பியுள்ள கடிதத்தில், "தமிழ்நாட்டில் தற்சமயம் கரோனா இரண்டாம் அலை வீசிவருவதால் அரசு அனைத்துத் துறைகளுக்கும் அறிவுறுத்தியுள்ளதால், தற்போது உயர் வகுப்புகளுக்கு மட்டும் பள்ளிகள் தொடங்கப்பட்டு நடைபெற்றுவருகின்றன.
மேலும் தேர்வுகள் நடத்துவதற்கான ஏற்பாடுகள் நடைபெற்றுவருவதாலும் அரசின் நெறிமுறைகளைக் கண்டிப்பாக ஒவ்வொரு பள்ளியிலும் பின்பற்ற வேண்டும்.
அரசின் வழிகாட்டுதலின்படி தகுந்த இடைவெளியுடன் கண்டிப்பாக குழந்தைகளை அமரவைக்க வேண்டும். அதிக எண்ணிக்கையில் குழந்தைகள் இருந்தால் அதற்கான சூழ்நிலைக்கு ஏற்ப மாற்று ஏற்பாடுகள் செய்யப்பட்டிருக்க வேண்டும். அனைத்துக் குழந்தைகளும் கண்டிப்பாக முகக்கவசம் அணிந்திருத்தல் வேண்டும். பள்ளியில் ஒவ்வொரு குழந்தைக்கும் கண்டிப்பாக உடல் வெப்ப பரிசோதனை செய்யப்பட வேண்டும்.
கிருமிநாசினி கண்டிப்பாக இருக்க வேண்டும். ஒவ்வொரு வகுப்பறையிலும் கிருமிநாசினி வைக்க வேண்டும். மாணவர்களின் கைகள் சுத்தமாக வைத்திருப்பதை ஆசிரியர்கள் கண்டிப்பாக உறுதிசெய்ய வேண்டும். வகுப்பறைக்குள் மாணவர்கள் உள்ளே வரும்போதும் வெளியே செல்லும்போதும் ஒருவருக்கொருவர் மோதிக்கொண்டு செல்லாமல், தகுந்த இடைவெளியுடன் செல்வதை ஆசிரியர்கள் உறுதிசெய்ய வேண்டும்.
மாணவர்கள் விளையாடும்போதும் தக்க பாதுகாப்புடன் விளையாடுவதை உடற்கல்வி ஆசிரியர்கள் உடனிருந்து கண்காணித்துப் பாதுகாப்பினை உறுதிசெய்ய வேண்டும். பேருந்துகளில் மாணவர்கள் வரும்பொழுது கிருமிநாசினி பயன்படுத்தப்படுவதுடன், முகக்கவசம் அணிந்து இருக்க வேண்டும். ஓட்டுநர்களும் கட்டாயம் முகக்கவசம் அணிந்து, தகுந்த இடைவெளியைக் கடைப்பிடிக்க வேண்டும்.
மாணவர்கள் மதிய உணவின்போது தகுந்த இடைவெளியைக் கடைப்பிடித்து தனித்தனியாக அமர்ந்து உணவு உட்கொள்வதை ஆசிரியர்கள் உறுதிசெய்ய வேண்டும். வகுப்பறைகள், ஜன்னல்கள், கதவுகள் உள்ளிட்ட அனைத்துப் பொருள்கள் மற்றும் இடங்களில் கிருமி நாசினியை நாள்தோறும் தெளிக்க ஏற்பாடு செய்ய வேண்டும்.
மாணவர்களுக்குத் தெரியும் வகையில் அனைத்து வகுப்பறைகளிலும் கரோனா குறித்து பாதுகாப்பு வழிமுறைகளை வைப்பதுடன் அவசர காலத்திற்கான தொலைபேசி எண்கள் அடங்கிய விவர அட்டைகளையும் வைக்க வேண்டும்.
இந்த விதிமுறைகளைப் பின்பற்றுவதில் ஆசிரியர்கள் மாணவர்களுக்கு முன்னுதாரணமாக இருக்க வேண்டும். பள்ளிகளில் கரோனா பாதுகாப்பு விதிமுறைகள் முறையாகக் கடைப்பிடிக்கப்படுகின்றனவா என்பதை குழந்தைகள் நல பாதுகாப்பு ஆணையத்தின் அலுவலர்கள் அவ்வப்போது திடீரென ஆய்வுசெய்வார்கள்" எனக் கூறியுள்ளார்.
இதன்மூலம் தமிழ்நாட்டில் கரோனா தீநுண்மி தொற்றின் இரண்டாவது அலை உருவாகி உள்ளது என்பது வெளிப்படையாகத் தெரியவந்துள்ளது.
