சென்னை: திரையுலகில் நடிகர், இயக்குநர், இசையமைப்பாளர், திரைக்கதை எழுத்தாளர் என பன்முக தோற்றம் கொண்டவர் தான் டி.ராஜேந்தர். சினிமா துறையில் நுழைந்தது முதலே தனது பல வகையான திறமைகளைத் திரையில் புகுத்தி, மக்கள் மனதில் தனக்கான இடத்தை பிடித்தார். மேலும் தமிழ் மீதான இவரது பற்றும், அடுக்கு மொழியில் அடுக்கி எடுக்கும் இவரது வசனங்களுக்கும், தனியானதொரு ரசிகர்கள் பட்டாளத்தையே இவர் பக்கம் குவித்தது.
இந்நிலையில், இயக்குநர் டி.ராஜேந்தர் இசையமைத்து 163 மொழிகளில் உருவாக்கம் செய்யப்படுவதாக சொல்லப்பட்டு வரும் 'நான் கடைசி வரை தமிழன்' என்ற திரைப்படத்தின் பூஜை மற்றும் டிரைலர் வெளியீட்டு விழா இன்று (செப்.3) சென்னை வடபழனி பிரசாத் லேபில் நடைபெற்றது. இப்படத்தை எம்.ஏ.ராஜேந்திரன் இயக்கியுள்ளார்.
விழாவில் நடிகர் இமான் அண்ணாச்சி பேசும்போது, "கொஞ்ச நாளாக இந்த சூப்பர் ஸ்டார் பட்டம் யாருக்கென்று ஒரு குழப்பம் போய் கொண்டு இருக்கிறது. அந்த பட்டத்தை டி.ராஜேந்தரிடம் தான் கொடுக்க வேண்டும்" என்று கூறினார். அதற்கு இயக்குநர் டி.ராஜேந்தர் அதெல்லாம் வேண்டாம் என்று கையெடுத்து கும்பிட்டது நிகழ்ச்சியில் பங்கேற்றோர் முகங்களில் நெகிழ்ச்சியை ஏற்படுத்தியது.
அதன்பிறகு இயக்குநர் டி.ராஜேந்தர் பேசும்போது, "நான் நேற்று வரை ஹைதராபாத்தில் தான் இருந்தேன். 'நான் கடைசி வரை தமிழன்' திரைப்படத்தின் பூஜை மற்றும் டிரைலர் வெளியீட்டு விழா என்று சொன்னதனால் தான் வந்தேன். ராஜேந்திர சோழன் பெருமையைக் கண்டு தான், எனக்கு விஜய ராஜேந்திர சோழன் என்று பெயர் வைத்தார் எனது அப்பா” எனக் கூறிய அவர், அள்ள அள்ள குறையாத தமிழ் என்று நடைமொழியில் தனது பாணியில் பேசினார்.
மேலும் அவர், “நான் பண்ணாரி அம்மன் படத்திற்கு பிறகு இசையமைப்பதை நிறுத்திவிட்டேன். படத்தில் தமிழன் என்று பார்த்த ஒரே காரணம் தான், நான் இந்த படத்திற்கு இசையமைக்கக் காரணம். இந்த நிகழ்ச்சியில் யார் யாரை பற்றி நான் பேச வேண்டும் என்று கார்டு கொடுத்தாங்க, எனக்கு விசிட்டிங் கார்டு கூட கிடையாது.
நான் மைக் புடிச்சு ரொம்ப நாள் ஆகிறது. இப்போதெல்லாம் பேசுவதே இல்லை. எனக்கு எந்த ஸ்டார் பட்டமும் வேண்டாம். வானத்தில் உதிக்கும் அந்த ஒரே ஸ்டார் போதும். இப்போதெல்லாம் நான் எந்த படங்களுக்கும் இசை அமைப்பதில்லை. காரணம், எந்த பாடலுக்கும் இப்போது சரியான Situation இல்லாமல் பாடல் போடுகிறார்கள்.
மேலும், இன்றும் நான் ட்ரம்ஸ் (Drums) ரொம்ப நேரம் வாசிக்கக் காரணம், நான் புகைப்பிடிக்க மாட்டேன், மது அருந்த மாட்டேன், தனி மனித ஒழுக்கத்தைக் கடைபிடித்து வருகிறேன். அதனால் தான் இன்றும் இப்படி இருக்கிறேன்” என்று தனது இளமையின் ரகசியத்தைப் பகிர்ந்தார்.
இதையும் படிங்க: Raghava Lawrence: ஏழை மாணவர்களின் கல்வி செலவிற்காக காசோலை வழங்கிய ராகவா லாரன்ஸ்!
