இலங்கை கிரிக்கெட் வீரர் முத்தையா முரளிதரன் வாழ்க்கை வரலாறு திரைப்படத்தில் நடிகர் விஜய் சேதுபதி நடிக்க முடிவாகி இருந்தது. இதுதொடர்பாக, பல்வேறு தரப்பினர் எதிர்ப்பு தெரிவித்ததையடுத்து முத்தையா முரளிதரனே, விஜய் சேதுபதி இந்தப் படத்திலிருந்து விலக வேண்டும் எனக் கோரிக்கைவைத்திருந்தார். அதனை ஏற்று விஜய் சேதுபதி இந்தப் படத்தில் நடிக்கவில்லை எனத் தெரிவித்திருந்தார்.
முன்னதாக இந்தப் படத்தில் விஜய் சேதுபதி நடிக்க இலங்கை வாழ் தமிழர்கள், பல்வேறு தரப்பினர் சமூக வலைதளங்களில் விஜய் சேதுபதிக்கு எதிரான கருத்துகளைப் பதிவுசெய்திருந்தனர். எனினும், குறிப்பிட்ட ஒரு நபர் விஜய் சேதுபதி மகள் குறித்து அருவருக்கத்தக்க வகையில், ஒரு கருத்தை தனது ட்விட்டர் பக்கத்தில் பதிவுசெய்திருந்தார். இது மிகப்பெரிய அதிர்ச்சியை ஏற்படுத்தியது.
மேலும், இதுதொடர்பாக விஜய் சேதுபதி ரசிகர் மன்றத் தலைவர் குமரன் சென்னை காவல் துறையில் அளித்த புகாரின் அடிப்படையில், மத்திய குற்றப்பிரிவு காவல் துறையினர் நான்கு பிரிவுகளின்கீழ் வழக்குப்பதிவு செய்து அந்த நபரின் ஐபி முகவரி உள்ளிட்ட தகவல்களைச் சேகரித்தனர்.
அப்போது, அது இலங்கையிலுள்ள ஐபி முகவரி எனத் தெரியவந்தது. இதனையடுத்து, வெளிநாட்டிலுள்ள ஒரு நபரைப் பிடிப்பதற்காக, இன்டர்போல் உதவியை சென்னை காவல் துறையினர் நாடினர்.
அந்த வகையில் சென்னை ப்ளூ கார்னர் நோட்டீஸ் தயார்செய்து, அந்த நபரைப் பிடிப்பதற்கு திட்டமிட்டிருந்தனர்.
இந்நிலையில், நேற்று தனியார் சமூக வலைதள பக்கத்திற்கு விஜய் சேதுபதி மகள் குறித்து கருத்து பரப்பியது தான்தான் என ஒருவர் தெரிவித்திருந்தார்.
ஒரு காலத்தில் வேலையின்மை காரணமாகவும், சற்று மனநிலை பாதிக்கப்பட்ட நிலையில் இருந்ததால் இவ்வாறு செய்துவிட்டதாகவும், ஒரு சகோதரனைப் போல் எண்ணி தன்னை மன்னித்துவிடுமாறும் விஜய் சேதுபதிக்கு கோரிக்கைவைத்துள்ளார்.
இந்தக் காணொலியின் உண்மைத்தன்மை குறித்து சென்னை மத்திய குற்றப்பிரிவு காவலரிடம் கேட்டபோது:
இந்தக் காணொலியின் உண்மைத்தன்மை குறித்து ஆய்வு செய்துவருகிறோம். வெளிநாட்டில் உள்ள நபரைப் பிடிக்க ப்ளூ கார்னர் நோட்டீஸ் அனுப்பும்போது, இந்தக் காணொலி தொடர்பான அறிக்கையையும் அனுப்ப, சென்னை காவல் துறையினர் முடிவுசெய்துள்ளனர்.
எனினும், அந்த நபர் சமூக வலைதளத்தில் மன்னிப்பு கோரி இருந்தாலும், அவர் செய்தது தண்டனைக்குரிய குற்றம் என்பதால், அதற்குரிய சட்ட நடவடிக்கைகள் எடுக்கப்படும்.
இவ்வாறு அவர் தெரிவித்தார்.
