சீன நாட்டில் பரவ தொடங்கிய கரோனா வைரஸ் (தீநுண்மி) காரணமாக பல நாடுகள் முன்னெச்சரிக்கை நடவடிக்கைகளை மேற்கொண்டன. அந்த வகையில், சீன மக்கள் நேபாளம், பூடான், வங்கதேசம், மியான்மர் எல்லைகள் வழியாக இந்தியாவிற்குள் நுழைய மத்திய அரசு தடைவிதித்தது.
கடந்த பிப்ரவரி 17ஆம் தேதி, சீனாவிலிருந்து சென்னை துறைமுகத்திற்கு வந்த கப்பலை சுங்கத் துறை அலுவலர்கள் சோதனை செய்தனர். அப்போது, விளையாட்டு பொம்மைகள் நிரம்பிய கண்டெய்னரில் கூண்டில் அடைக்கப்பட்ட நிலையில் பூனை ஒன்று இருந்தது தெரியவந்தது.
இதையடுத்து, பூனைக்கு மருத்துவப் பரிசோதனை நடத்தப்பட்டது. இருப்பினும் கரோனா பரவும் அச்சம் நிலவியதால் பூனை அரசு கட்டுப்பாட்டில் தனிமைப்படுத்தப்பட்டது. இதற்கு பீட்டா உள்பட பல விலங்குகள் நல ஆர்வலர்கள் கண்டனம் தெரிவித்துவந்தனர்.
பின்னர், சென்னை விலங்கு தனிமைப்படுத்தல் மற்றும் சான்றிதழ் சேவை அமைப்பினர் (Chennai's Animal Quarantine and Certification Services) 30 நாள் தனிமைப்படுத்தப்பட்ட காலம் முடிந்ததும், பூனையை திருப்பி ஒப்படைக்க மத்திய அரசு அறிவுறுத்தியது.
அதன்படி, சென்னை சுங்கத் துறை அலுவலர்கள் தி கேட்டிடியூட் அறங்கட்டளையிடம் (The Cattitude Trust) மே 23ஆம் தேதி பூனையை திருப்பி ஒப்படைத்தனர். தற்போது, ஸ்டோவேவே பூனை (Stowaway cat) தத்தெடுப்புக்கு தயாராக உள்ளது எனக் கூறப்படுகிறது.
இதையும் படிங்க: பூனையை தூக்குமேடைக்கு ஏற்றிய டிக் டாக் விரும்பி
