இளநிலை மருத்துவப் படிப்பிற்கு 15 விழுக்காடு இடங்களும், முதுநிலை மருத்துவப் படிப்பிற்கு 50 விழுக்காடு இடங்களும் அகில இந்திய இடஒதுக்கீட்டிற்கென வழங்கப்பட்டு வருவதாகவும், அவ்வாறு இடஒதுக்கீடு வழங்கப்படாமல் மோசடி நடந்திருப்பதாகவும் வில்சன் கூறியுள்ளார்.
தொடர்ந்து இது தொடர்பாக அண்ணா அறிவாலயத்தில் செய்தியாளர்களைச் சந்தித்துப் பேசிய வில்சன், ”இந்தப் பிரச்னை குறித்து நாடாளுமன்றத்தில் ஏற்கனவே பேசியுள்ளேன். மத்திய சுகாதார அமைச்சருக்கும் கடிதம் எழுதியிருந்தேன். அதற்கு அவர் எழுதிய பதில் கடிதத்தில் ’இடஒதுக்கீடு மாநிலத்திற்கு மாநிலம் வேறுபடும் என்பதால் மாநிலத்திலேயே தனியாகச் சட்டம் இயற்றி இட ஒதுக்கீட்டை பின்பற்றலாம்’ எனத் தெரிவித்திருந்தார்.
அதன்படி தமிழ்நாடு அரசை பொறுத்தவரை 1994ஆம் ஆண்டு சட்டத்தின்படி பிற்படுத்தப்பட்ட, மிகவும் பிற்படுத்தப்பட்ட மாணவர்களுக்கு 50 விழுக்காடு இட ஒதுக்கீடு வழங்க வேண்டும். ஆனால், இந்தச் சட்டத்தின்படி மத்திய அரசுக்கு வழங்கப்படும் அகில இந்திய இட ஒதுக்கீடு பின்பற்றப்படாமல் பொருளாதாரத்தில் பின்தங்கியவர்கள் என்கின்ற அடிப்படையிலேயே இடங்கள் ஒதுக்கப்படுகின்றன. இது சமூகநீதிக்கு எதிரானது. எனவே இதனை உடனடியாக தடுக்க மத்திய அரசும் தமிழ்நாடு அரசும் முயற்சி எடுக்க வேண்டும். இதனால் இடம் கிடைக்காமல் பிற்படுத்தப்பட்ட, மிகவும் பிற்படுத்தப்பட்ட மாணவர்கள் வெகுவாக பாதிப்புக்குள்ளாகின்றனர்.
உதாரணமாக தமிழ்நாட்டில் 7,150 இடங்களில் அகில இந்திய இடஒதுக்கீடு 15 விழுக்காட்டின்படி 1,073 இடங்கள் ஒதுக்கப்பட வேண்டும். இதில் 50 விழுக்காடு இடங்கள் பிற்படுத்தப்பட்ட, மிகவும் பிற்படுத்தப்பட்ட மாணவர்களுக்கு ஒதுக்கப்படும் எனில் 536 இடங்கள் ஒதுக்கப்பட வேண்டும். ஆனால் அவர்களுக்கு கடந்த இரண்டு ஆண்டுகளாக இந்த இடங்கள் ஒதுக்கப்படவில்லை.
இதேபோல் முதுநிலை மருத்துவப் படிப்பில் 537 இடங்கள், முதுநிலை பட்டயப்படிப்பில் 197 இடங்கள், பல் மருத்துவப் படிப்பில் 74 இடங்கள் ஆகிய இடங்கள் ஒதுக்கப்படாமல் இருந்துவருகின்றனர். இந்த நிலையில் அடுத்தாண்டு மருத்துவப் படிப்பிற்கான அறிவிப்புகளை தற்போது மத்திய அரசாங்கம் வெளியிட்டுள்ளது. ஆனால் அதில் இந்த இடஒதுக்கீடு தொடர்பாக எங்கேயும் குறிப்பிடப்படவில்லை” எனத் தெரிவித்துள்ளார்.
இதையும் படிங்க: இட ஒதுக்கீடு தொடர்பாக கடிதம் எழுதிய திமுக எம்பி வில்சன்: பதிலளித்த மத்திய அமைச்சர்!
