சென்னை: சென்னை ராஜா அண்ணாமலைபுரத்தில் உள்ள அம்பேத்கர் மணிமண்டபத்தில் நடைபெறும் புனரமைப்பு பணி மற்றும் அம்பேத்கர் திருவுருவ சிலை அமைக்கும் பணியை பொதுப்பணி துறை அமைச்சர் எ.வ.வேலு பார்வையிட்டார். பின்னர் கிண்டியில் நடைபெற்று வரும் அயோத்திதாசர் மணிமண்டபம் பணிகளையும் பார்வையிட்ட பின் செய்தியாளர்களை சந்தித்தார்.
அப்போது பேசிய அவர், "2021- 22 ஆம் நிதிநிலை அறிக்கையில் முதலமைச்சர் 110 விதியின் கீழ் அயோத்தி தாசருக்கு மணிமண்டபம் அமைக்கும் அறிவிப்பை வெளியிட்டார். அதன்படி 2.48 கோடி மதிப்பீட்டில் கிண்டியில் அயோத்திதாசருக்கு மணிமண்டபம் கட்டப்பட்டு வருகிறது. ஏப்ரல் மாதத்திற்குள் பணிகள் முடிக்கப்படும்.
இதை போல் அம்பேத்கர் மணி மண்டபத்தில் நூலகம் அமைப்பது மற்றும் புனரமைப்பு பணிகள் நடைபெறுகிறது. அம்பேத்கர் மணி மண்டப வளாகத்தில் அம்பேத்கர் திருவுருவ சிலையை வரும் 27ஆம் தேதி முதலமைச்சர் திறந்து வைக்க உள்ளார். கடந்த 10 ஆண்டுகளாக கிடப்பில் போடப்பட்டிருந்த மதுரவாயில் துறைமுகம் உயர்மட்ட சாலை அமைக்கும் திட்டத்திற்கு ஒப்பந்தங்கள் போடப்பட்டுள்ளது. 2 ஆண்டுகளில் பணிகள் முடிக்கப்பட்டு பயன்பாட்டிற்கு கொண்டு வர திட்டமிடப்பட்டுள்ளது.
சென்னையில் நெடுஞ்சாலைத்துறை சார்பில் நடைபெறும் மழைநீர் வடிகால் பணிகள் 95 விழுக்காடு நிறைவடைந்துள்ளது. இரண்டு மூன்று நாட்களில் மீதமுள்ள பணிகள் நிறைவடையும். சென்னையில் பகல் நேரங்களில் மழை நீர் வடிகால் பணிகள் நடைபெறுவது சாத்தியமில்லை என்பதால் இரவு 11 மணி முதல் காலை 5 மணி வரை மட்டுமே பணிகள் நடைபெறுவதால் தாமதம் ஏற்படுகிறது.
தனியார் தொலைக்காட்சி ஊழியர் முத்துகிருஷ்ணன் எந்த இடத்தில் விழுந்தார் என்பதை கண்டுபிடிக்க முடியவில்லை, விசாரணை நடந்து கொண்டிருக்கிறது. உதயம் தியேட்டர் அருகில் மழை நீர் வடிகால் பணிகள் முத்துகிருஷ்ணன் விழுந்த அன்று அதிகாலை 2.30 மணி வரை நடந்துள்ளது. அந்த பகுதியில் பள்ளம் இல்லை என்பது தெரியவந்துள்ளது. அதனால் எந்த இடத்தில் விழுந்தார் என்பது குறித்து விசாரணை நடைபெறுகிறது.
நகர்ப்புறங்களில் மட்டும் தான் மில்லிங் செய்து சாலை அமைக்கப்படுகிறது. கிராமங்களில் மில்லிங் செய்வது கிடையாது. மில்லிங் செய்தாலும் சாலை சிறிது உயரத்தான் செய்யும்" என்றார்.
இதையும் படிங்க: சூரிய கிரகணம்: ஆட்டுக்கல்லில் உலக்கை வைத்து அறிந்துகொள்ளும் கிராமம்
