முதுகலை ஆசிரியர் பணி மற்றும் உடற்கல்வி இயக்குநர் நிலை 1 பணிக்கு ஒரு லட்சத்து 85 ஆயிரத்து 466 தேர்வர்கள் விண்ணப்பித்திருந்தனர். இவர்களுக்கான எழுத்துத் தேர்வு செப்டம்பர் 27, 28, 29 ஆகிய தேதிகளில் ஆன்லைன் மூலம் தமிழ்நாடு முழுவதும் 154 மையங்களில் நடைபெற்றது.
இந்தத் தேர்வை எழுதுவதற்கு விண்ணப்பம் செய்த ஒரு லட்சத்து 85 ஆயிரத்து 466 தேர்வர்களில், ஒரு லட்சத்து 46 ஆயிரத்து 580 தேர்வர்கள் எழுதியுள்ளனர். 37 ஆயிரத்து 866 பேர் தேர்வு எழுதவில்லை. தேர்வில் பெற்ற மதிப்பெண்களின் விவரம் ஆசிரியர் தேர்வு வாரிய இணையதளத்தில் ஏற்கனவே வெளியிடப்பட்டது. அதனைத் தொடர்ந்து தற்போது பாடவாரியாக தேர்ச்சி பெற்றவர்களில் சான்றிதழ் சரிபார்ப்புக்குத் தகுதியானவர்களின் பட்டியலை ஆசிரியர் தேர்வு வாரியம் வெளியிட்டுள்ளது.
இயற்பியல், தாவரவியல், உடற்கல்வியியல், புவியியல், மனை அறிவியல், இந்திய கலாசாரம், அரசியல் அறிவியல், ஆங்கிலம், உயிர்வேதியியல், வணிகவியல், தமிழ், நுண்ணுயிரியல் (மைக்ரோ பயாலஜி), கணக்கு, வேதியியல், விலங்கியல், பொருளாதாரம், வரலாறு ஆகிய பாடங்களுக்கான தேர்வர்களில் சான்றிதழ் சரிபார்ப்புக்கு தகுதியானவர்கள் மூன்றாயிரத்து 824 பேரின் பட்டியலைப் பாடவாரியாக ஆசிரியர் தேர்வு வாரிய www.trb.tn.nic என்ற இணையதள முகவரியில் வெளியிடப்பட்டுள்ளன.
மேலும் ஆதிதிராவிடர் நலத் துறை, பழங்குடியினர் நலத் துறை ஆகியவற்றிலுள்ள காலிப் பணியிடங்களுக்கும் இந்தத் தேர்வுப் பட்டியலிலிருந்து ஆசிரியர்களைத் தேர்வு செய்வதற்கான காலிப்பணியிடங்கள் விவரத்தையும் வெளியிட்டுள்ளது. அவர்களும் இந்தத் தேர்வுப் பட்டியலிலிருந்து தேர்வு செய்யப்படுவார்கள் என ஆசிரியர் தேர்வு வாரியம் அறிவித்துள்ளது.
தமிழ்நாட்டில் பள்ளிக் கல்வித் துறையில் காலியாக உள்ள முதுகலை ஆசிரியர்கள் மற்றும் உடற்கல்வி இயக்குநர் நிலை 1 ஆகியவற்றிற்கான விண்ணப்பங்கள் ஜூன் மாதம் 24ஆம் தேதி முதல் ஜூலை மாதம் 15ஆம் தேதிவரை ஆன்லைன் மூலம் பெறப்பட்டன. இதன்மூலம் இரண்டாயிரத்து 144 முதுகலை ஆசிரியர்கள் மற்றும் உடற்கல்வி இயக்குநர் நிலை 1 ஆகிய பணியிடங்களில் நியமனம் செய்யப்படவுள்ளனர். சான்றிதழ் சரிபார்ப்பு நவ. 8 , 9ஆம் தேதிகளில் 11 மையங்களில் நடைபெறும் என ஆசிரியர் தேர்வு வாரியம் அறிவித்துள்ளது.
இதையும் படிங்க: 'நீட் எழுதிய 7,000 மாணவர்களின் கைரேகைகள் ஆய்வு' - சிபிசிஐடி
