சென்னை: வளசரவாக்கம் அகஸ்தீஸ்வரர் மற்றும் வேள்வீஸ்வரர் கோயிலுக்கு அதன் அருகிலேயே 186 சென்ட் பரப்பளவில் குளம் அமைந்துள்ளது. இத்திருக்குளமானது சென்னை பெருநகர மாநகராட்சியின் மூலம் புனரமைக்கும் பணிகள் நடைபெற்று வருகின்றன.
இந்த திருக்குளப் பணிகளை இந்து சமய அறநிலையத்துறை அமைச்சர் சேகர்பாபு நேரில் பார்வையிட்டு ஆய்வு செய்தார்.
அதன் பின்னர் செய்தியாளர்களிடம் கூறும்போது, அகத்தீஸ்வரர் மற்றும் வேல்வீஸ்வரர் கோயிலின் திருக்குளம் சம்பந்தமான வரப்பெற்ற புகாரைத் தொடர்ந்து கடந்த ஜூலை மாதம் இத்திருக்கோயிலுக்கு நேரடியாக வருகை தந்து ஆய்வு செய்தோம். தற்போது இந்த திருக்குளத்தின் பணிகளுக்காக ஒதுக்கப்பட்டிருந்த நிதி ரூ.1.50 கோடியிலிருந்து ரூ. 1.70 கோடியாக உயர்த்தப்பட்டு, குளத்தின் நீர்த்தேக்க அளவு குறையாமல், குளத்தின் மொத்த பரப்பளவையும் பயன்படுத்துகின்ற வகையிலும், அதனைச் சுற்றி நடைபாதை, பூத்துக் குலுங்கும் தெய்வத்திற்கு உகந்த பூக்கள் தரும் செடிகளையும் அமைத்து சிறப்பான எழில் நயத்தோடு உருவாக்க வேண்டும் என்று திட்டமிட்டு செய்து கொண்டிருக்கிறோம்.
சென்னை மாநகராட்சி மூலமாகவே இந்த குளத்தை அமைப்பதற்கு உண்டான பணிகளை மேற்கொள்ள திட்டமிட்டு இருக்கின்றோம். அகத்தீஸ்வரர் மற்றும் வேள்வீஸ்வரர் திருக்கோயிலுக்கு கடந்த 2010 ஆம் ஆண்டு திருப்பணிகள் முடிவுற்று கும்பாபிஷேகம் நடைபெற்று இருக்கின்றது. ஆகம விதிப்படி 12 ஆண்டுகள் பூர்த்தியாகும் நிலையில் இந்த திருக்கோயிலில் திருப்பணிகளை மேற்கொள்வதற்கு ஏதுவாக முதற்கட்டமாக மண்டல குழு, மாநில குழுவினுடைய ஒப்புதல் பெறப்பட்டிருக்கின்றது.
சன்னிதானத்தை சுற்றி வருகின்ற பகுதி குறுகலாக இருக்கின்ற இடங்களில் அகலப்படுத்துவதற்கு வல்லுநர்களின் ஆலோசனை பெற்று சன்னிதானத்தை விரிவுபடுத்தப்படும். மேலும், திருக்குளத்தை சுற்றி கோபுரம் அமைத்தல், குளத்திற்கு தேவையான வசதிகளை ஏற்படுத்துகின்ற வகையில் மூலவர் சன்னதிக்கு முன்புறமுள்ள பாழடைந்த கற்காறை மண்டபத்தை நீக்கி, கருங்கல் மண்டபமாக மாற்றி அமைத்தல், சுற்றுச்சுவரை உயர்த்தி கட்டுதல் போன்ற பணிகளுக்கு திட்ட மதிப்பீடு செய்யப்பட்டு தயாராக உள்ளது.
இத்திருக்கோயிலுக்கு இராஜகோபுரம் கட்டுகின்ற பணியையும் தொடங்க இருக்கின்றோம். திருக்கோயில் வளாகத்தை சுற்றி கருங்கல் தள பாதையை அமைக்க இருக்கின்றோம். அனைத்து சன்னதிகளும் வர்ணங்கள் பூசப்பட்டு ரூபாய் 75 லட்சம் செலவில் திருப்பணிகள் மேற்கொள்ளவுள்ளோம். மேலும் கூடுதலாக நிதி தேவைப்பட்டாலும் வழங்கிட தயாராக உள்ளோம். இரண்டு மாத காலத்திற்குள் பணிகளை தொடங்கி ஓராண்டுக்குள் திருப்பணிகளை முடித்து குடமுழுக்கு நடத்த திட்டமிட்டு இருக்கிறோம். ஆன்றோர்களும், சான்றோர்களும் பக்தர்களும் இதற்கு பேருதவியாக இருந்து முழு ஒத்துழைப்பை தந்து இந்த திருக்கோயிலுக்கு வருகின்ற பக்தர்கள் சிரமமின்றி மகிழ்ச்சியாக இறை தரிசனம் செய்வதற்கு உண்டான அனைத்து ஏற்பாடுகளையும் செய்து தருவோம்.
திருச்செந்தூர் திருக்கோயில் உள்ளே கடந்த காலங்களில் பாந்து என்ற முறையில் யாகம் வளர்த்து அங்கேயே தங்கி இருக்கின்றனர். ஆகமவிதிப்படி திருக்கோயில் நடை அடைத்தபிறகு உள்ளே யாரும் தங்கக் கூடாது. அதுமட்டுமல்லாமல், அங்கே தங்குகின்ற 400 நபர்கள் யார் என்பதை அடையாளம் காணப்பட முடியவில்லை. அதனால் இந்தமுறை பாந்து நடைமுறைக்கு அனுமதி மறுத்து, அவர்கள் திருக்கோயில் அருகிலேயே அமைக்கப்பட்டுள்ள தற்காலிக கூடாரத்தில் தங்கி விரதம் மேற்கொள்ள வசதிகள் செய்துதருவதென நிர்வாகம் முடிவெடுத்தது.
இது சம்பந்தமாக நீதிமன்றத்திற்கு சென்றனர். உயர்நீதிமன்ற மதுரை கிளை நீதியரசர்கள் இதில் இருக்கின்ற உண்மைத் தன்மையை அறிந்து தமிழ்நாடு அரசையும், இந்து சமய அறநிலையத்துறையும் பாராட்டி இருக்கின்றனர். இது வரவேற்கத்தக்கது. அதேபோன்று ஒரு சில நேரங்களில் எங்களின் குறைகளை சுட்டி காட்டினாலும், அதையும் நிறைவு செய்கின்ற பணிகளில் இந்து சமய அறநிலையத்துறை தன்னை ஈடுபடுத்திக் கொள்ளும்' எனத் தெரிவித்தார்.
இதையும் படிங்க: பாஜக பந்த் வழக்கு; போராட்டம் நடந்தால் சட்டப்படியான நடவடிக்கை எடுக்கலாம்..!
