சென்னை: ராஜீவ் காந்தி கொலை வழக்கில் குற்றம் சாட்டப்பட்ட சாந்தனின் நாடு கடத்தல் வழக்கை விசாரிப்பதில் இருந்து விலகுவதாக நீதிபதி அறிவித்தார். மேலும், வழக்கறிஞராக இருந்தபோது ராஜீவ் காந்தி கொலை வழக்கில், உச்சநீதிமன்றத்தில் ஆஜரானதால், தற்போது வழக்கை தான் விசாரிப்பது முறையாக இருக்காது என்று கூறி, சாந்தனை இலங்கைக்கு அனுப்பக்கோரி தொடரப்பட்ட வழக்கை விசாரிப்பதிலிருந்து விலகுவதாக நீதிபதி தெரிவித்தார்.
கடந்த 1991ஆம் ஆண்டு மே 21ம் தேதி முன்னாள் பிரதமர் ராஜீவ் காந்தி, ஶ்ரீ பெரும்பத்தூர் அருகே மனித வெடிகுண்டு தாக்குதலில் உயிரிழந்தார். இது தொடர்பாக கைது செய்யப்பட்ட 7 பேருக்கும் தூக்கு தண்டனை விதிக்கப்பட்டது. பின்னர், அவை ஆயுள் தண்டனையாகவும் மாற்றப்பட்டு கடந்த 2022 நவம்பர் 11ஆம் தேதி, கைது செய்யப்பட்டவர்கள் உச்சநீதிமன்றத்தால் விடுதலை செய்யப்பட்டனர்.
அதனைத்தொடர்ந்து, விடுதலை செய்யப்பட்ட இலங்கையை சேர்ந்த சாந்தன் என்கிற சுதேந்திரராஜா, சென்னை உயர்நீதிமன்றத்தில் மனு ஒன்றை தாக்கல் செய்தார். மனுவில், உச்சநீதிமன்றத்தால் விடுதலை செய்யப்பட்டும் தொடர்ந்து, திருச்சி அகதிகள் முகாமில் அடைக்கப்பட்டுள்ளேன். மேலும், இலங்கையில் வசித்து வரும் எனது தாய் மகேஸ்வரியை (வயது 75) தான் கவனித்துக் கொள்ள வேண்டும் என்பதால் பாஸ்போர்ட் வழங்குமாறு குறிப்பிட்டு இருந்தார்.
இதையும் படிங்க: அமைச்சர் செந்தில் பாலாஜி மருத்துவமனையில் அனுமதி! திடீர் நெஞ்சுவலி எனத் தகவல்!
அதனைத்தொடர்ந்து, கடந்த செப்டம்பர் 11ஆம் தேதி பாஸ்போட் விண்ணப்பித்தும் எந்த நடவடிக்கையும் எடுக்கவில்லை என்பதால், பாஸ்போர்ட் வழங்க உத்தரவிட வேண்டும் என கோரிக்கை விடுத்துள்ளார். இந்நிலையில், இந்த வழக்கு நீதிபதிகள் சுந்தர் மற்றும் சுந்தர் மோகன் அடங்கிய அமர்வில் விசாரணைக்கு வந்தது. விசாரணையில், மனுதாரர் தரப்பில், ஏற்கனவே நளினி மற்றும் முருகனின் மனுக்கள் பரிசீலிக்கப்பட்டு வருவதால், சாந்தன் மனுவையும் விசாரித்து பாஸ்போட் வழங்க உத்தரவிட வேண்டும் என தெரிவித்தனர்.
அதனைத்தொடர்ந்து, வழக்கை விசாரித்த நீதிபதிகளில் ஒருவரான நீதிபதி சுந்தர் மோகன், "வழக்கறிஞராக இருந்தபோது ராஜீவ் காந்தி கொலை வழக்கில் உச்சநீதிமன்றத்தில் ஆஜரானதால், தற்போது வழக்கை தான் விசாரிப்பது முறையாக இருக்காது என்றும், வழக்கில் இருந்து விலகுவதாகவும், வேறு நீதிபதிகளின் விசாரணையை மேற்கொள்ள, தலைமை நீதிபதிக்கு பரிந்துரை செய்வதாகவும் தெரிவித்தார்.
இதையும் படிங்க: சர்வதேச ரிங்பால் போட்டியில் இந்திய வீரர்கள் பதக்கம்.. மேள தாளங்கள் முழங்க உற்சாக வரவேற்பு அளித்த ஊர் மக்கள்!
