சென்னை: கீழ்ப்பாக்கம் அரசு மருத்துவக்கல்லூரி மருத்துவமனையில் தீபாவளி தீக்காய உள்நோயாளிகள் பிரிவில் மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன் நேரில் ஆய்வு மேற்கொண்டு, அடிப்படை உயிர் காக்கும் முறைகள் மற்றும் விபத்தினால் காயம் அடைந்தவர்களை பாதுகாக்கும் முறைகள் ஆகிய வசதிகளை பார்வையிட்டு, உலக விபத்து விழிப்புணர்வு தின உறுதிமொழியேற்று, தீயணைப்பு மற்றும் மீட்புப் பணிகளின் செயல்பாடு விளக்கத்தைப் பார்வையிட்டார்.
பின்னர் அமைச்சர் மா.சுப்பிரமணியன் செய்தியாளர்களிடம் கூறும்போது, ”அரசு கீழ்ப்பாக்கம் மருத்துவக்கல்லூரி மருத்துவமனையில் 1973ஆம் ஆண்டு 75 படுக்கைகளுடன் கூடிய சிறப்பு தீக்காய பிரிவு தொடங்கப்பட்டது. 24 மணி நேரமும் மருத்துவர்கள், செவிலியர்கள் மற்றும் ஊழியர்கள் தீக்காயம் ஏற்பட்ட நோயாளிகளுக்கு சிகிச்சை அளித்து வருகிறது.
தமிழ்நாடு மற்றும் அண்டை மாநிலங்களில் இருந்தும் சிகிச்சைப் பெற்று பயனடைந்து வருகின்றனர். இந்த மருத்துவமனையில் 24 மணி நேரமும் அறுவை அரங்குகள் செயல்பட்டு வருகின்றன. நோயாளிகளுக்கு தேவைக்கேற்ப அவசர அறுவை சிகிச்சை முறைகளும் செய்யப்பட்டு வருகின்றன.
நோயாளிகள், முதலில் விபத்து மற்றும் அறுவை சிகிச்சைப்பிரிவில் அனுமதிக்கப்பட்டு, ஆரம்ப கட்ட அவசர சிகிச்சைக்குப் பின் தீக்காயப் பிரிவிற்கு மாற்றப்படுகின்றனர். சீரான காற்றோட்ட வசதியுடன் கூடிய வார்டும், அறுவை அரங்கும் உள்ளன.
மேலும், தீக்காயம் என்பது அஜாக்கிரதை, மன உளைச்சலால் தற்கொலை முயற்சி, ஆசிட், மின்சாரம் தாக்குதல் மற்றும் கவனக்குறைவாக பட்டாசு வெடிப்பதாலும் ஏற்படலாம். மக்கள் தற்கொலை முயற்சியில் ஈடுபடுவதைத் தவிர்க்க வேண்டும்.
தீபாவளி பட்டாசு விபத்தினால் ஏற்பட்ட தீக்காயத்திற்கு 2019இல் 40 பேர் உள்நோயாளிகளாகவும், 15 பேர் வெளிநோயாளிகளாகவும், 2020இல் 9 பேர் புறநோயாளிகளாகவும், 6 பேர் உள்நோயாளிகளாகவும், 2021இல் 22 பேர் புறநோயாளிகளாகவும், 8 பேர் உள்நோயாளிகளாகவும் சிகிச்சைப் பெற்றுள்ளனர்” எனத் தெரிவித்தார்.
இதையும் படிங்க: திராவகம் கலந்த குளிர்பானத்தால் சிறுவன் உயிரிழப்பு - சிபிசிஐடிக்குக்கு மாற்றம்
