திருவள்ளூர் மாவட்டம், பூந்தமல்லி அடுத்த பழஞ்சூர் பகுதியில் தனியார் பொழுதுபோக்குப் பூங்கா உள்ளது. இந்தப் பூங்காவில் நீச்சல் குளம், ராட்டினம், டிராகன், ரோப் கார் உள்ளிட்ட பொழுதுபோக்கு அம்சங்கள் உள்ளன. மேலும், “ப்ரீ பால் டவர்” என்னும் விளையாட்டும் உண்டு. நீண்ட உயரத்திற்கு ராட்சத இரும்புத்தூண் அமைக்கப்பட்டு அதன் மத்தியில் இரும்புத் தொட்டில் போல் ராட்டினம் அமைக்கப்பட்டு பொதுமக்கள் அதில் அமர்ந்தவுடன் மேலே சென்று, வேகமாக கீழே இறங்கும் வகையில் அமைக்கப்பட்டுள்ளது.
தினந்தோறும் சிறுவர்கள் முதல் பெரியவர்கள் வரை ஏராளமானோர் வந்து செல்கின்றனர். இந்நிலையில், நேற்று முன்தினம் இங்குள்ள ராட்டினத்தில் சுற்றுலாப் பயணிகள் ஏறி உள்ளனர். அப்போது திடீரென ஒரு பகுதியில் இருந்த ராட்டினத்தின் இரும்புக் கம்பிகள் அறுந்து கீழே விழுந்தன.
உயரமான பகுதியில் சென்றபோது இரும்புக் கம்பிகள் அறுந்து விழுந்திருந்தால் ஏராளமான உயிரிழப்புகள் ஏற்பட்டு இருக்கும். கீழ் பகுதியில் இருந்தபோது, ராட்டினத்தின் ஒரு பகுதி இரும்புக் கம்பிகள் அறுந்து விழுந்ததால் லேசான காயங்களுடன் அதில் பயணித்தவர்கள் நல்வாய்ப்பாக உயிர் தப்பினர்.
ராட்டினக் கயிறு அறுந்த காட்சிகளை அங்கு சென்ற ஒருவர் செல்போனில் படம் பிடித்துள்ளார். இந்த வீடியோ சமூக வலைதளங்களில் பரவிவருகிறது. இது குறித்து நசரத்பேட்டை காவல் துறையினர் விசாரணை நடத்திவருகின்றனர்.
இந்நிலையில் இன்று குயின்ஸ்லேண்ட் பொழுதுபோக்குப் பூங்காவை மூட காவல் துறை உத்தரவிட்டுள்ளது. பூங்காவை வருவாய்த் துறையினர் ஆய்வு செய்து உறுதி செய்த பிறகே பூங்காவை இயக்க வேண்டும் என கூறப்படுகிறது. மறு உத்தரவு வரும்வரை குயின்ஸ்லேண்டை மூடி வைத்திருக்க உத்தரவு பிறப்பிக்கப்பட்டுள்ளது.
இது குறித்து அங்கு வந்த பொதுமக்கள் கூறுகையில், மிகவும் பிரபலமான இந்தப் பொழுதுபோக்குப் பூங்காவில் கோடை விடுமுறைக்கு ஏராளமானோர் வந்து செல்கின்றனர். பொதுமக்கள் அதிகளவில் வருவதால் இந்தப் பொழுதுபோக்குப் பூங்காவில் உள்ள இயந்திரங்களை, அதன் உரிமையாளர்கள் சரியாக பரிசோதிப்பது இல்லை.
இதனால் விபத்துகள் ஏற்பட வாய்ப்புள்ளது. எனவே இனியும் அரசு அலுவலர்கள் சற்றும் தாமதிக்காமல் பொழுதுபோக்குப் பூங்காவில் உள்ள இயந்திரங்களின் தரம், உறுதித் தன்மையை ஆராய வேண்டும் என்றனர்.
