நெல்லை எம்.பி. ஞானதிரவியத்திற்கு திமுக தலைமை நோட்டீஸ்

திருநெல்வேலி நாடாளுமன்ற உறுப்பினர் ஞானதிரவியத்திற்கு திமுக தலைமை நோட்டீஸ் அனுப்பி உள்ளது.

சென்னை: திருநெல்வேலி நாடாளுமன்ற உறுப்பினரான ஞானதிரவியம், பாளையங்கோட்டை ஜான்ஸ் பள்ளியின் தாளாளராகவும் மற்றும் திருமண்டல மேல்நிலைப்பள்ளி நிலைக் குழு உறுப்பினராகவும் பதவி வகித்து வந்தார். இந்த நிலையில், திருச்சபைகளில் உள்ள காலிப் பணியிடங்களை நிரப்புவதற்கு தனது ஆதரவாளர்களை நியமனம் செய்யக்கோரி, திருச்சபைக்கு ஞானதிரவியம் அழுத்தம் கொடுத்ததாகக் கூறப்படுகிறது.

இதனால், ஞானதிரவியத்தை நீக்கி தென்னிந்திய திருச்சபையைச் சேர்ந்த நெல்லை திருமண்டல பிஷப் உத்தரவிட்டு இருந்தார். இதனையடுத்து, இந்த பதவிக்கு அருள் மாணிக்கம் என்பவர் நியமனம் செய்யப்பட்டார். இதனிடையே, திருச்சபையில் உள்ள பேராயர் நோபலிடம் ஞானதிரவியத்தை நீக்கியது குறித்து எம்.பி.யின் ஆதரவாளர்கள் விளக்கம் கேட்டு வாக்குவாதத்தில் ஈடுபட்டு உள்ளனர்.

இந்த வாக்குவாதத்தின்போது, ஒரு கட்டத்தில் எம்.பி. ஞானதிரவியம் தரப்பினர் நெல்லை பேராயர் நோபலை கடுமையாகத் தாக்கி உள்ளனர். இதனால் இரு தரப்பினர் இடையே கடுமையான மோதல் ஏற்பட்டு உள்ளது. இந்த மோதலில் காயம் அடைந்த நோபல், நடைபெற்ற மோதல் குறித்து திருநெல்வேலி காவல் ஆணையர் அலுவலகத்தில் புகார் அளித்தார்.

அந்த புகாரில், ஞானதிரவியம் நீக்கம் குறித்து விளக்கம் கொடுக்கும் கூட்டத்தில் திமுகவினர் தன்னை தாக்கியதாக குறிப்பிட்டு இருந்தார். மேலும், இந்த மோதல் தொடர்பான வீடியோ சமூக வலைதளங்களில் வைரல் ஆனது. இந்த நிலையில், திருநெல்வேலி நாடாளுமன்ற உறுப்பினர் ஞானதிரவியத்திடம் விளக்கம் கேட்டு திமுக பொதுச் செயலாளர் துரைமுருகன் நோட்டீஸ் அனுப்பி உள்ளார்.

இவ்வாறு துரைமுருகன் அனுப்பி உள்ள நோட்டீஸில், “திருநெல்வேலி நாடாளுமன்றத் தொகுதி திமுக உறுப்பினர் சா.ஞானதிரவியம், கட்சியின் வளர்ச்சிக்கு குந்தகம் விளைவிப்பதாகவும், கட்சிக்கு அவப்பெயர் ஏற்படும் வகையில் செயல்படுவதாகவும் கட்சித் தலைமைக்கு புகார் வரப் பெற்றுள்ளது.

மேலும், அவரது இந்த செயல் கட்சியின் கட்டுப்பாட்டை மீறியும், கட்சிக்கு அவப்பெயர் ஏற்படும் வகையிலும் உள்ளது. எனவே, இது குறித்த அவரது விளக்கத்தினையும், செயல்பாடுகளையும் இந்தக் கடிதம் கிடைத்த 7 நாட்களுக்குள் கட்சித் தலைமைக்கு நேரிலோ அல்லது தபால் மூலமோ தெரிவிக்க வேண்டும் எனவும், அப்படி தெரிவிக்கத் தவறும் பட்சத்தில், அவர் மீது ஒழுங்கு நடவடிக்கை மேற்கொள்ளப்படும்” எனவும் குறிப்பிடப்பட்டு உள்ளது.

முன்னதாக, கடந்த 2021ஆம் ஆண்டு நெல்லையில் பாஜக பிரமுகரைத் தாக்கியதாகவும், அப்போது ஓட்டலில் இருந்த சிசிடிவி பதிவுகளை எடுத்துச் சென்றதாகவும் குற்றச்சாட்டு எழுந்தது. மேலும், எம்.பி. ஞானதிரவியம் மீது கொலை வழக்குப் பதிவு செய்ய வேண்டும் எனவும் பாஜக தரப்பில் கோரிக்கை வைக்கப்பட்டது. அது மட்டுமல்லாமல், ஞானதிரவியத்தின் மகன் தினகரன் மீது மணல் கடத்தல் வழக்கும் உள்ளது என்பது குறிப்பிடத்தக்கது.

இதையும் படிங்க: ’நாங்க ஒன்னும் அதுக்காக வரலையே’.. நெல்லையில் ஓட்டம் பிடித்த பெண்களின் பின்னணி என்ன?