சென்னை: அரசுத் தேர்வுத்துறை இன்று(ஜூன் 15) வெளியிட்டுள்ள செய்திக் குறிப்பில் கூறியிருப்பதாவது, "ஆகஸ்ட் மாதம் நடைபெறவுள்ள தொடக்கக்கல்வி பட்டயத்தேர்வுக்கு விண்ணப்பிக்க விரும்பும் தனித்தேர்வர்கள் tn.dge.in என்ற இணையதள முகவரியில் விண்ணப்பத்தை பூர்த்தி செய்து, விண்ணப்பத்துடன் ஏற்கெனவே தேர்வெழுதி தேர்ச்சி பெற்ற மதிப்பெண் சான்றிதழ்களின் அனைத்து நகல்களையும் இணைத்து, தேர்வர் வசிக்கும் மாவட்டத்துக்கு அருகில் அமைந்துள்ள மாவட்ட ஆசிரியர் கல்வி மற்றும் பயிற்சி நிறுவனத்தின் மூலமாக ஜூன் 28ஆம் தேதி முதல் ஜூலை 7ஆம் தேதி வரையிலான நாள்களில் விண்ணப்பிக்கலாம். காலை 10 மணி முதல் முதல் மாலை 5.45 மணி வரை விண்ணப்பிக்கலாம்.
மாவட்ட ஆசிரியர் கல்வி மற்றும் பயிற்சி நிறுவனங்களில் பொருத்தப்பட்டுள்ள "வெப் கேமரா'' மூலமாக புகைப்படம் எடுக்கும் வசதி செய்யப்பட்டுள்ளதால் அந்த நிறுவனங்களிலேயே புகைப்படத்துடன் கூடிய விண்ணப்பங்களை பதிவேற்றம் செய்த பின்னர், அங்கேயே தேர்வுக் கட்டணம் செலுத்த வேண்டும்.
தேர்வுக் கட்டணம் விவரம்: தேர்வுக் கட்டணமாக ஒவ்வொரு பாடத்துக்கும் ரூ.50, மதிப்பெண் சான்றிதழ் (முதலாமாண்டு) ரூ.100, மதிப்பெண் சான்றிதழ் (இரண்டாமாண்டு) ரூ.100, பதிவு மற்றும் சேவைக் கட்டணம் ரூ.15, இணையவழி பதிவுக் கட்டணம் ரூ.50 என நிர்ணயிக்கப்பட்டுள்ளது.
விண்ணப்பம் செய்ய அனுமதிக்கப்பட்ட தேதிகளில் விண்ணப்பிக்கத் தவறும் தனித்தேர்வர்கள் சிறப்பு அனுமதித் திட்டத்தில் ஜூலை 8, 9 ஆகிய தேதிகளில் விண்ணப்பிக்கலாம். இதற்கு சிறப்பு அனுமதி கட்டணமாக ரூ.1,000 செலுத்த வேண்டும். தகுதியற்ற தேர்வர்களின் விண்ணப்பங்கள் ரத்து செய்யப்படும். தபால் மூலமாக பெறப்படும் விண்ணப்பங்கள் கண்டிப்பாக நிராகரிக்கப்படும்" என அதில் தெரிவிக்கப்பட்டுள்ளது.
இதையும் படிங்க: 10ஆம் வகுப்பு பொதுத்தேர்வு முடிவுகள் எப்போது வெளியாகிறது தெரியுமா?
