ராஜிவ் காந்தி கொலை வழக்கில் வேலூர் சிறையில் அடைக்கப்பட்டுள்ள ஆயுள் தண்டனைக் கைதி முருகனிடம் இருந்து கைப்பேசிகள் கைபற்றப்பட்டதாகக் கூறி, சமீபத்தில் தனிமைச் சிறைக்கு அவர் மாற்றப்பட்டார். இதனைக் கண்டித்து கடந்த 15 நாட்களாக பட்டினிப் போராட்டம் நடத்திய நிலையில் அவரின் உடல் நலம் பாதிக்கப்பட்டது.
அவருக்கு உரிய மருத்துவ சிகிச்சைகள் வழங்கக்கோரி, அவருடைய உறவினர் தேன்மொழி என்பவர், சென்னை உயர் நீதிமன்றத்தில் ஆட்கொணர்வு மனு தாக்கல் செய்திருந்தார். இந்த மனு நீதிபதிகள் எம்.எம். சுந்தரேஷ், டீக்கா ராமன் ஆகியோர் அடங்கிய அமர்வு முன்பு விசாரணைக்கு வந்தது. அப்போது, முருகனுக்கு மருத்துவ சிகிச்சைகள் வழங்கப்பட்டு வருவதாகவும், தற்போது அவரின் உடல்நிலை சீராக இருப்பதாகவும் சிறைத் துறை தரப்பில் தெரிவிக்கப்பட்டது.
மேலும் முருகனுக்கு சிறையில் வழங்கப்பட்டுவரும் மருத்துவ சிகிச்சைகள் தொடர்பாக அறிக்கை தாக்கல் செய்ய, கால அவகாசம் வழங்க வேண்டும் என சிறைத் துறை தரப்பில் கோரப்பட்டது. இதனை ஏற்று ஒரு வாரம் அவகாசம் வழங்கிய நீதிபதிகள், மனுவுக்குப் பதிலளிக்க சிறைத் துறைக்கு உத்தரவிட்டு விசாரணையை நவம்பர் 14ஆம் தேதிக்கு ஒத்தி வைத்தனர்.
இதையும் படிங்க: ’தனி அறை... உணவு கொடுக்காமல் சித்ரவதை..!’ - முருகன் முன்வைக்கும் பரபரப்பு குற்றச்சாட்டுகள்
