தமிழக பாஜக தலைவர் தமிழிசை சௌந்திரராஜன் தலைமையில் கமலாலயத்தில் மக்கள் குறைதீர்க்கும் கூட்டம் இன்று நடைபெற்றது. பின்னர் செய்தியாளர்களிடம் பேசிய தமிழிசை சௌந்தர்ராஜன்,
நாளை மறுதினம் அமித்ஷா ஈரோடு வருகிறார். வரும் 15-ம் தேதி சென்னைக்கு வரும் மத்திய அமைச்சர் நிதின்கட்கரியும், தேசிய தலைவர்கள் பலரும் தமிழகம் வருகிறார்கள். வாக்குச்சாவடி அளவில் எங்களை பலப்படுத்தி வருகிறோம்.
மோடி வருகை மட்டும் சற்று தள்ளி போகிறது. ஒரு வாரத்திற்கு முன்பே பிரதமர் மோடி வருகை குறித்து தகவல் வந்தும், திருப்பூர் மாநாட்டில் கவனம் செலுத்தியதால் இதை பற்றி முன்னதாக தெரிவிக்க முடியவில்லை. பிரதமரின் வருகை சரியாக திட்டமிடப்பட்டு வருகிறோம். தமிழகத்திற்கு பல நல்ல திட்டங்களையும் மத்திய அரசு அளித்து வருகிறது. அதன் காரணமாகவே திருப்பூர் கூட்டத்தில் அதிகளவில் விவசாயிகள் அதிகமாக கலந்து கொண்டனர்.
பிரதமரின் வீடு கட்டும் திட்டம், மருத்துவ காப்பீட்டு திட்டம், மத்திய அரசின் உதவியோடு தான் நடைபெறுகிறது. தமிழகத்திற்கு கிடைக்க வேண்டிய அனைத்தும் கிடைக்கும். 21 தொகுதி இடைத்தேர்தல் குறித்த ஸ்டாலின் பேச்சுக்கு பதிலளித்த தமிழிசை, காலையில் எழுந்தவுடன் ஏதாவது சொல்லவேண்டுமென ஸ்டாலின் புலம்பிக் கொண்டிருக்கிறார்.
பல கட்சிகளோடு பேச்சுவார்த்தை நடைபெறுகிறது. காங்கிரஸ் திமுக இல்லாத கட்சிகளுடன் கூட்டணி பேசிக்கொண்டிருக்கிறோம். எதிர்கட்சிகளின் மெகா கூட்டணியை தோற்கடிக்கும் அளவிற்கு நாங்கள் கூட்டணி அமைப்போம். எங்களுடைய எதிரி கட்சி காங்கிரஸ்-திமுகதான். வருகின்ற தேர்தலில் மக்களுக்கான கட்சிகளுடன் கூட்டணி வைக்கப்படும். பாஜக இடம் பிடிக்கின்ற கூட்டணி, அதிகம் பாராளுமன்ற உறுப்பினர்களை பெற்று தரும்.
டிக் டாக் செயலியை தடுத்தால் முதலில் மகிழ்ச்சியடைவது நானாக தான் இருப்பேன். எங்களை போன்ற அரசியல் தலைவர்களை தான் அதிகம் கிண்டல் செய்கின்றனர். இதை தடைசெய்தால் வரவேற்போம்.
கட்சித் தலைமை கேட்டுக்கொண்டால் நான் மக்களவை தேர்தலில் போட்டியிட தயார். பாஜகவிற்கு எதிராக அதிமுக எம்பி தம்பிதுரை பேசி வருவது தெரியும். அது கண்டிப்பாக அதிமுகவின் கருத்தாக இருக்காது. சொந்த கருத்தாகவே இருக்கும், என்றார்.
