சென்னை திருவொற்றியூர் காந்தி நகர் இரண்டாவது தெருவைச் சேர்ந்த செந்தில் குமார் தனியார் நிறுவனம் ஒன்றில் வேலை பார்த்து வருகிறார். கடந்த சனிக்கிழமை இரவு வேலையை முடித்துவிட்டு தனது வீட்டின் வாசல் அருகே இருசக்கர வாகனத்தை (பஜாஜ் பல்சர்) நிறுத்திவைத்துள்ளார். ஞாயிற்றுக்கிழமை காலை எழுந்து வெளியேவந்து பார்த்தபொழுது நிறுத்திவைக்கப்பட்டிருந்த இரு சக்கர வாகனத்தை காணவில்லை.
இதனால் அதிர்ச்சியடைந்த, செந்தில் குமார் தனது வீட்டின் அருகே பொருத்தப்பட்டிருந்த சிசிடிவி கேமரா பதிவை பார்த்தபோது, அதிகாலை 5 மணிக்கு இரண்டு இளைஞர்கள் இருசக்கர வாகனத்தில் வந்து பஜாஜ் பல்சரை திருட முயற்சி செய்தனர்.
அப்போது அப்பகுதியில் ஒரு பெண் நடந்துவந்தபோது அங்கிருந்து கிளம்பிச் சென்றனர். அப்பெண் அங்கிருந்து சென்றதைத் தொடர்ந்து மீண்டும் வந்த அந்த இரண்டு பேர் பஜாஜ் பல்சரை திருடிச் சென்றது தெரியவந்துள்ளது.
இது குறித்து திருவொற்றியூர் காவல் நிலையத்தில் செந்தில்குமார் அளித்தப் புகாரின் அடிப்படையில் வழக்குப்பதிவு செய்து திருவொற்றியூர் காவல் துறையினர் இருசக்கர வாகனத்தை திருடிச் செல்லும் நபர்களை தேடிவருகின்றனர்.
