இந்து மக்கள் கட்சியின் வணிகர் சங்கம் சார்பில் அதனுடைய ஆலோசனைக் கூட்டம் தூத்துக்குடி மாவட்டம் உடன்குடியில் நடைபெறுகிறது. இதில் கலந்துகொள்ள சென்னையிலிருந்து விமானம் மூலம் தூத்துக்குடி வந்த இந்து மக்கள் கட்சி தலைவர் அர்ஜுன் சம்பத் செய்தியாளர்களைச் சந்தித்தார்.
அப்போது அவர் கூறுகையில், "நேற்றைய தினம் (புதன்கிழமை) நடிகர் விஜய்யின் வீடு, அவருடைய தொழில் நிறுவனங்களில் வருமானவரித் துறை சோதனையிட்டு பல முக்கிய ஆவணங்கள் கைப்பற்றியுள்ளனர். 150 கோடி ரூபாய்க்கும் மேல் அவர்கள் மோசடி செய்திருப்பது கண்டுபிடிக்கப்பட்டிருக்கிறது.
சமீபத்தில் அவர் நடித்து வெளியான பிகில் திரைப்படம் சுமார் 400 கோடி ரூபாய்வரை வசூல் செய்திருக்கிறது. அந்த கோடிக்கணக்கான ரூபாய்களுக்கு வருமான வரியை செலுத்தாமல் அரசாங்கத்தை ஏமாற்றி இருக்கிறார்கள். விஜய் மட்டுமல்ல பனிமலர் கல்வி நிறுவனங்கள் தாளாளர், அவருடைய தகப்பனார், அவர்களுடைய மகள், அதாவது ஜேப்பியார் குடும்பத்தாரும் விஜய்யும் இணைந்து சினிமா தொழில் தயாரிப்பில் என பல்வேறு விதமான மோசடிகளில் ஈடுபட்டிருக்கிறார்கள்.
ஆகவே வருமானவரித் துறை, அமலாக்கத் துறை உள்ளிட்ட நம்முடைய மத்திய அரசாங்கத்தின் துறைகள் விஜய் உள்ளிட்டோர் மீது நடவடிக்கை எடுத்து அவருடைய சொத்துக்களை பறிமுதல் செய்ய வேண்டும். சினிமாவுக்குள் நிறைய கிறிஸ்துவ நிறுவனங்கள் ஊடுருவி, இந்து சமூகத்தை இழிவுபடுத்தும் வகையில் படங்களைத் தயாரித்துக்கொண்டிருக்கின்றன. அவை தடுக்கப்படவேண்டும்.
தை பூசம், மகா சிவராத்திரி பண்டிகைகளுக்கு தமிழ்நாடு அரசு விடுமுறை அளிக்க வேண்டும். இந்தியாவில் அனைத்து தரப்பினரும் குடியுரிமை திருத்தச் சட்டத்துக்கு ஆதரவாக உள்ளனர். ஆனால், திமுக அதற்கு எதிர்ப்பு இருப்பதாகக் கூறி கோயபெல்ஸ் பிரசாரம் செய்து வருகிறது.
குடியுரிமை திருத்தச் சட்டத்துக்கு எதிராக போராட்டம் இந்தியாவில் நடத்துவதற்காக திமுகவுக்கு, பாகிஸ்தானிலிருந்து நிதி உதவி வருகிறது. அதிலிருந்து வரக்கூடிய பணத்தை வைத்துத்தான் 380 கோடி ரூபாய்க்கு பிரசாந்த் கிஷோரை திமுக தேர்தல் வல்லுநராக ஒப்பந்தம் செய்துள்ளது" என்றார்.
இதையும் படிங்க : விஜய் பாடலால் கடுப்பான ரஜினி...
