2015 - 2018ஆம் ஆண்டுக்கான தென்னிந்திய நடிகர் சங்கத் தேர்தலில், நாசர் தலைமையிலான அணி வெற்றி பெற்றது. இவர்களின் பதவிக்காலம் கடந்த ஆண்டு அக்டோபர் மாதம் நிறைவடைந்த நிலையில், புதிய நிர்வாகிகளை தேர்ந்தெடுக்க தேர்தல் நடத்தியாக வேண்டிய சூழல் ஏற்பட்டுள்ளது.
இந்நிலையில் நேற்று மாலை சென்னையில் உள்ள தனியார் உணவு விடுதியில் தென்னிந்திய திரைப்பட நடிகர்கள் சங்கத்தின் சிறப்பு செயற்குழு கூட்டம் நடைபெற்றது. நாசர் தலைமையில் நடைபெற்ற இந்த கூட்டத்தில் விஷால், பூச்சி முருகன், மனோபாலா, ஸ்ரீமன், குட்டி பத்மினி உள்ளிட்டோர் பங்கேற்றனர். இந்த சிறப்பு செயற்குழு கூட்டத்தில் பல்வேறு முக்கிய தீர்மானங்கள் எடுக்கப்பட்டது.
பின்னர், செய்தியாளர்களுக்கு பேட்டியளித்த நடிகர் நாசர், "நீதியரசர் பத்மநாபனை தேர்தல் அதிகாரியாக நியமிக்க சிறப்பு செயற்குழு கூட்டத்தில் ஒருமனதாக தீர்மானம் நிறைவேற்றப்பட்டது. இதனால் இன்று நடிகர் சங்க அலுவலகம் நீதியரசர் பத்மநாபனிடம் ஒப்படைக்கப்படும். நடைபெறவுள்ள தென்னிந்திய நடிகர் சங்கத்தின் தேர்தலில் என் தலைமையிலான அணியே போட்டியிடும். தேர்தல் நடத்த இரண்டு இடங்கள் தேர்வு செய்யப்பட்டு நீதியரசர் பத்மநாபனிடம் அளிக்கப்படும். தேர்தல் நடத்தும் அதிகாரியாக அவர் செயல்படுவார்" என்றார்.
