சென்னை: நீட் தேர்வில் மோசடி செய்து மருத்துவக்கல்லூரியில் சேர்ந்தது தொடர்பாக இரண்டு வழக்குகள் சிபிசிஐடி விசாரணையில் உள்ளன. இதுதொடர்பாக சிபிசிஐடி காவல் துறையினர் மோசடி செய்து, மருத்துவக்கல்லூரியில் சேர்ந்த மாணவர்கள், அவர்களின் பெற்றோர்கள் என சுமார் 15 பேருக்கும் மேல் கைது செய்தனர்.
இந்நிலையில், கடந்த பிப்ரவரி மாதம் மோசடி செய்து தேர்வு எழுதிய மாணவர்கள் 10 பேரின் புகைப்படத்தை சிபிசிஐடி காவல் துறையினர் வெளியிட்டனர். மேலும், அவர்களது புகைப்படத்தை வைத்து, அவர்களது விவரங்களை கொடுக்குமாறு பெங்களூருவில் உள்ள ஆதார் ஆணையத்திற்கு சிபிசிஐடி காவல்துறையினர் கடிதம் எழுதியுள்ளனர்.
இதற்குப் பதில் எழுதியுள்ள ஆதார் ஆணையம், சிபிசிஐடி அளித்த புகைப்படத்தை வைத்து அவர்களது தகவலை தரவுகளின் மூலம் கண்டுபிடிக்கமுடியவில்லை எனக் கூறியுள்ளது. இந்த வழக்கில் தலைமறைவாக உள்ள முக்கியக் குற்றவாளியான இடைத்தரகர் ரஷீத்தை தீவிரமாக தேடி வருவதாக சிபிசிஐடி காவல் துறையினர் தெரிவித்துள்ளனர்.
இதையும் படிங்க: நீட் தேர்வு மோசடி செய்த மாணவர் சூர்யா மனு தொடர்பில் சிபிசிஐடி பதில் சொல்ல நீதிமன்றம் உத்தரவு!
