பள்ளிகளுக்கு 16ஆம் தேதி விடுமுறை - பள்ளிக்கல்வித்துறை

தமிழ்நாட்டில் 16ஆம் தேதி பள்ளிகளுக்கு விடுமுறை வழங்கி பள்ளிக்கல்வித்துறை ஆணையர் நந்தகுமார் உத்தரவிட்டுள்ளார்.

சென்னை : இதுகுறித்து மாவட்ட முதன்மை கல்வி அலுவலர்களுக்கு அனுப்பி உள்ள சுற்றறிக்கையில், "பல்வேறு ஆசிரியர் சங்கங்களிடமிருந்து பெறப்பட்ட கோரிக்கைகளில், செப்டம்பர் 1 முதல் பள்ளிகள் வாரத்தில் ஆறு நாள்களும் செயல்பட்டு வருவதாகவும், மாணவர்கள் விடுப்பின்றி பள்ளிக்கு வருகை புரிவதாகவும் தெரிவித்திருந்தனர்.

கணிசமான ஆசிரியர்கள் தங்களது சொந்த மாவட்டங்களிலிருந்து தொலைதூரத்தில் பணிபுரிந்து வருகின்றனர். எனவே, அக்டோபர் 14,15ஆம் தேதி ஆகிய இருநாள்கள் அரசு விடுமுறையாக அறிவிக்கப்பட்டுள்ளதால் வார இறுதி நாளான அக்டோபர் 16ஆம் தேதி சனிக்கிழமை விடுமுறை வழங்குமாறு கோரிக்கை விடுத்துள்ளனர்.

எனவே மாணவர்கள், ஆசிரியர்களின் நலன் கருதி 16ஆம் தேதி அன்று பள்ளிகளுக்கு விடுமுறை வழங்கப்படுகிறது”என குறிப்பிடப்பட்டுள்ளது.