இதுகுறித்து பள்ளிக்கல்வித் துறை வெளியிட்டுள்ள அரசாணையில், '' 2017-18ஆம் கல்வியாண்டிற்கு முன்பு தமிழ்நாடு பாடத்திட்டத்தில் அல்லது வேறு மாநில பாடத்திட்டத்தில் அல்லது மத்திய இடைநிலைக் கல்வி வாரியத்தின் பாடத்திட்டத்தில் (சிபிஎஸ்இ) 11ஆம் வகுப்பில் தேர்ச்சிபெற்ற மாணவர்கள், தற்போது பள்ளிகளில் 12ஆம் வகுப்பு படித்து வருகின்றனர்.
இதுபோன்று படித்துவரும் 12ஆம் வகுப்பு மாணவர்களை, மீண்டும் 11ஆம் வகுப்பு தேர்வு எழுத அறிவுறுத்தாமல், அவர்களின் நலன் கருதியும் மன அழுத்தத்தினைக் குறைக்கும் வகையிலும் 12ஆம் வகுப்பு தேர்வினை தமிழ்நாடு பாடத்திட்டத்தில் எழுதுவதற்கு அனுமதிக்க வேண்டும் என அரசு தேர்வுத் துறை இயக்குநர் கடிதம் எழுதியுள்ளார்.
அதனடிப்படையில், சிபிஎஸ்இ அல்லது வேறு மாநில பாடத்திட்டத்தில் 11ஆம் வகுப்பு தேர்ச்சி பெற்று, தற்போது பள்ளிகளில் 12ஆம் வகுப்பு படித்து வரும் மாணவர்கள், நேரடியாக 12ஆம் வகுப்பு பொதுத் தேர்வை தமிழ்நாடு பாடத்திட்டத்தில் எழுதலாம்.
2017- 18ஆம் கல்வியாண்டிற்கு முன்பு தமிழ்நாடு பாடத்திட்டத்தில் 11ஆம் வகுப்பு தேர்வினை எழுதி தேர்ச்சி பெற்ற மாணவர்கள், அதே பாடத் தொகுப்பில் 12ஆம் வகுப்பு பொதுத் தேர்வை எழுதலாம்.
இந்த மாணவர்கள் 12ஆம் வகுப்பு பொதுத் தேர்வில் பெறும் மதிப்பெண்களை மட்டுமே மதிப்பெண் சான்றிதழில் அச்சிட்டு வழங்கப்படும். நேரடி தனித் தேர்வர்களுக்கு இந்தச் சலுகைப் பொருந்தாது.
இனிவரும் காலங்களில் 11ஆம் வகுப்பு பொதுத் தேர்வை எழுதாமல் மத்திய அரசின் இடைநிலை கல்வி வாரிய பாடத்திட்டம் அல்லது வேறு மாநில பாடத்திட்டத்தில் படித்த மாணவர்கள் அந்தப் பள்ளியின் சான்றிதழுடன் 12ஆம் வகுப்பில் சேர்வதற்கு முன்னர் பள்ளிக்கல்வி இயக்ககத்தின் முன் அனுமதியைப் பெற வேண்டும்'' என்று குறிப்பிடப்பட்டுள்ளது.
இதையும் படிங்க: ஜெ.தீபா மனுவுக்கு கெளதம் மேனன் பதிலளிக்க உயர்நீதிமன்றம் உத்தரவு
