மக்கள் நீதி மய்யம் தலைவர் கமல்ஹாசன் சுதந்திர இந்தியாவின் முதல் தீவிரவாதி நாதுராம் கோட்சே ஒரு ஹிந்து என கருத்து தெரிவித்தது நாடு முழுவதும் பல்வேறு அதிர்வலைகளை ஏற்படுத்தியது. இந்த கருத்துக்கு பல்வேறு தரப்பினர் கண்டனமும், ஆதரவும் தெரிவித்துவந்தனர். அந்தவகையில்,கமலின் கருத்துக்கு மன்னார்குடி ஜீயரும் கடும் கண்டனம் தெரிவித்தார். அத்துடன், கோட்சேவும் தேசபக்கதன் என்றும் தெரிவித்திருந்தார்.
இதற்கு தமிழ்நாடு காங்கிரஸ் கமிட்டி தலைவர் கே.எஸ். அழகிரி கண்டன அறிக்கை வெளியிட்டுள்ளார். அதில், 'மன்னார்குடி ஜீயர், கோட்சே தேசப்பற்றின் காரணமாகத்தான் மகாத்மா காந்தியை கொன்றார் என்று கூறியுள்ளார். ஜீயரின் கருத்து என்னை அதிர்ச்சியடைய வைத்தது. ஸ்ரீ கிருஷ்ணருடைய மறு அவதாரமாக அவரை நான் பார்க்கிறேன்.
மகாத்மா காந்தியையும், கோட்சேவையும் ஜீயர் ஒன்றுப்படுத்தி பேசியதை படித்தபோது நான் அதிர்ச்சியடைந்து, இந்த செய்தியை படிக்க நேரிட்டதே என்று வருந்தி என்னுடைய இரண்டு கண்களையும் பிடுங்கி எறிந்து விடலாமா என்றுகூட யோசித்தேன். மதநம்பிக்கை என்பது வேறு, ஆனால் அந்த நம்பிக்கையை வேறு ஒருவர் மீது திணிப்பது என்பது வேறு. இந்த காரியத்தை எந்த மதத்தினர் செய்தாலும் அவர்களை காங்கிரஸ் எதிர்க்கும்.
இந்து மதத்தின் சிறப்பே சகிப்புத் தன்மைதான். அதற்கு மாறாக ஜீயர் போன்றவர்கள் இத்தகைய மதநல்லிணக்கத்தை சீர்குலைக்கிற கருத்துக்களை கூறி சமூக அமைதியை சிதைக்க வேண்டாம் என கேட்டுக் கொள்கிறேன்.மிகவும் சிக்கலான தத்துவக் கொள்கையையே புரிந்து வைத்திருக்கிற ஜீயரால் இந்த எளிய உண்மையை எவ்வாறு புரிந்து கொள்ள முடியவில்லை. அவருடைய கண்களை எது மறைத்தது ? ஜீயரும் ஏதாவது ஒரு நிர்ப்பந்தத்திற்கு அடிபணிகிறாரா ?
நான் மகாத்மா காந்தியினுடைய வாழ்க்கையாலும், இந்து மதத்தின் மீது அவர் வைத்திருந்த நம்பிக்கையாலும், அதே நேரத்தில் அவருடைய மதச்சார்பற்ற தன்மைகளாலும் கவரப்பட்ட ஒரு உண்மையான வைஷ்ணவன். மகாத்மா காந்தியின் கொலையை நியாயப்படுத்தி ஜீயர் சொன்னது என்னை மட்டுமல்ல, இந்து மதத்தைச் சார்ந்த அனைவரையும், மனிதகுலத்தின் மீது அன்பு வைத்திருக்கிற எல்லோரையும் மிகவும் காயப்படுத்தியிருக்கிறது. இந்த செயலை ஜீயர் தவிர்த்திருந்தால் அவருக்கு மிகுந்த பெருமை சேர்த்திருக்கும். மகாத்மா காந்தியை கொன்ற கோட்சேவை நியாயப்படுத்தியதற்காக ஸ்ரீ கிருஷ்ணபிரான் அவருக்கு மிகப்பெரிய தண்டனையை வழங்க வேண்டுகிறேன்' எனத் தெரிவித்துள்ளார்.
