அரியலூரில் KFC கிளை தொடங்குவதற்கு அனுமதி தருவதாக மோசடி.. கர்நாடகாவைச் சேர்ந்த இருவர் கைது..!

KFC Franchise Money Fraud in Ariyalur: அரியலூரில் ஆன்லைன் மூலமாக KFC கிளை தொடங்குவதற்கான அனுமதி உரிமம் (Franchise) தருவதாகக் கூறி பண மோசடியில் ஈடுபட்ட கர்நாடகா மாநிலத்தைச் சேர்ந்த இருவர் கைது செய்யப்பட்டுள்ளனர்.

அரியலூர்: அரியலூர் இராஜாஜி நகர், கீரைக்கார தெருவில் வசிப்பவர் கொளஞ்சிநாதன். இவர் அரியலூரில் KFC (kentucky fried chicken) தொடங்குவதற்காக சபையர் ஃபுட்ஸ் (Sapphire foods website) என்ற இணையதளம் வாயிலாகப் பதிவு செய்ததாகக் கூறப்படுகிறது.

இந்த நிலையில் KFC கிளை தொடங்குவதற்காக NOC (No Objection Certificate), உரிமம் (Licence), பாதுகாப்பு வைப்புத் தொகை (Security Deposit Amount) மற்றும் பதிவு கட்டணம் (Registration Fees) என பல்வேறு காரணங்கள் கூறி, பல்வேறு தவணைகளில் மொத்தம் ரூ.66,20,000 பணத்தைப் பெற்றுக் கொண்டு ஏமாற்றி விட்டதாக, இணைய வழியில் புகார் அளித்துள்ளார்.

இதனை அடுத்து அரியலூர் சைபர் கிரைம் காவல் நிலையத்தில் வழக்குப் பதிவு செய்யப்பட்டது. இது தொடர்பாக விசாரணை செய்து குற்றச் செயலுக்காகப் பயன்படுத்திய வங்கிக் கணக்குகளில் இருந்த ரூ.6,03,029 முடக்கம் செய்யப்பட்டு, வங்கி பணப் பரிவர்த்தனைகள் மற்றும் தொலைப்பேசி எண்களை ஆய்வு செய்ததில் மோசடியில் ஈடுபட்டவர்கள் கர்நாடகா மாநிலம் பெங்களூர் பகுதியில் தங்கியிருப்பது தெரியவந்தது.

இதன் தொடர்ச்சியாகத் திருச்சி மண்டல காவல்துறைத் தலைவர் கார்த்திகேயன் மற்றும் திருச்சி சரக காவல்துறை துணைத் தலைவர் பகலவன் ஆகியோரின் அறிவுறுத்தலின்படி அரியலூர் மாவட்ட காவல் கண்காணிப்பாளர் மற்றும் அரியலூர் மாவட்ட சைபர் கிரைம் கூடுதல் காவல் கண்காணிப்பாளர் ஆகியோரின் தலைமையில் 9 பேர் கொண்ட சிறப்புக் காவலர்கள் குழு அமைக்கப்பட்டது.

இந்த குழு கர்நாடக மாநிலம் பெங்களூர் சென்று விசாரணை மேற்கொண்டு பண மோசடியில் ஈடுபட்ட கர்நாடகா மாநிலத்தைச் சேர்ந்த முகமது இத்ரீஸ் (39) மற்றும் தருண் (21) ஆகிய இருவரையும் கைது செய்தனர். இதன் தொடர்ச்சியாக அவர்களிடம் நடத்திய விசாரணையில் இருவரும் மோசடி செயலுக்கு உடந்தையாகச் செயல்பட்டதும் மோசடி செய்த பணத்தை சுமார் 15 வங்கிக் கணக்குகளின் மூலமாகப் பீகாரில் உள்ள தங்களது முக்கிய கூட்டாளிக்கு அனுப்பி வைத்தும் தெரியவந்தது.

மேலும், இதுபோன்று பொய்யான இணையதளங்களைத் தொடங்கி, அதன் மூலம் இதேபோல பல நபர்களை மோசடி செய்த பணத்தினை வங்கிக் கணக்குகளில் செலுத்தி, அதனை தங்களுக்குள் பிரித்துக் கொண்டது தெரியவந்தது. இதனை அடுத்து அவர்களிடம் இருந்து 2 செல்போன்கள், 4 சிம்கார்டுகள், வங்கிக் கணக்குப் புத்தகம், காசோலை மற்றும் ATM கார்ட் முதலியவற்றை போலீசார் பறிமுதல் செய்துள்ளனர்.

இதுமட்டும் இல்லாது கைது செய்யப்பட்டவர்கள் குறிப்பிட்ட பீகாரில் உள்ள அவர்களின் கூட்டாளியைக் கைது செய்ய நடவடிக்கை எடுக்கப்பட்டு வருகிறது. மேலும் அடுத்தகட்ட விசாரணைக்குப் பின்னர் போலீசார் வழக்குப் பதிவு செய்து இருவரையும் நீதிமன்ற காவலுக்கு அனுப்பி வைத்தனர்.

இதையும் படிங்க: துபாய் நிகழ்ச்சியில் கொலை மிரட்டல்? - முற்றுபுள்ளி வைத்த பூஜா ஹெக்டே தரப்பு!