சர்வதேச டென்னிஸ் கூட்டமைப்பு (ஐடிஎஃப்) சார்பில் ஆடவர் டென்னிஸ் வீரர்களுக்கான டேவிஸ் கோப்பை தொடர் ஆண்டுதோறும் நடத்தப்படுகிறது. 100 வருடத்திற்கும் மேல் பழமையான இந்தத் தொடரில் இந்தியா - பாகிஸ்தான் ஆகிய நாடுகளுக்கு இடையேயான போட்டி வருகின்ற நவம்பர் 29, 30 ஆகிய தேதிகளில் நடைபெறவுள்ளது. இந்தப் போட்டியை பாகிஸ்தான் தலைநகர் இஸ்லாமாபாத்தில் நடத்த திட்டமிடப்பட்டிருந்தது. ஆனால் வீரர்களின் பாதுகாப்புக்கு அச்சுறுத்தல் உள்ளதாகக் கூறி பாகிஸ்தானுக்கு செல்ல சில இந்திய வீரர்கள் மறுப்பு தெரிவித்தனர்.
இதனால் போட்டியை வேறு இடத்திற்கு மாற்றுமாறு சர்வதேச டென்னிஸ் கூட்டமைப்பிடம் இந்திய டென்னிஸ் சங்கம் தொடர்ந்து வலியுறுத்தியது. இதனிடையே சர்வதேச டென்னிஸ் கூட்டமைப்பு இந்தியா - பாகிஸ்தான் டேவிஸ் கோப்பை போட்டி தொடர்பான அறிவிப்பை நேற்று வெளியிட்டது.
அந்த அறிவிப்பில், சர்வதேச டென்னிஸ் கூட்டமைப்பின் சுதந்திர பாதுகாப்பு ஆலோசகர்கள் அளித்த அறிவுரையின் அடிப்படையில் டேவிஸ் கோப்பை தொடரை பாகிஸ்தானில் நடத்த வேண்டாம் என்ற முடிவு எடுக்கப்பட்டுள்ளது. இந்தப் போட்டியை பொதுவான ஒரு இடத்தில் நடத்தவும் திட்டமிடப்பட்டுள்ளது. மேலும் வீரர்கள், ரசிகர்கள் ஆகியோர் பாதுகாப்பாக இருப்பதற்கே ஐடிஎஃப் மற்றும் டேவிஸ் கோப்பை கமிட்டி முன்னுரிமை அளிக்கும் என தெரிவிக்கப்பட்டுள்ளது.
இதனால் டேவிஸ் கோப்பை விதிமுறைகளின்படி, தற்போது பாகிஸ்தான் டென்னிஸ் கூட்டமைப்பிற்கு, போட்டியை நடத்தும் இடத்தை தேர்வு செய்ய வாய்ப்பு வழங்கப்பட்டுள்ளது. அவர்கள் இதனை அடுத்த ஐந்து வேலை நாட்களுக்குள் உறுதி செய்ய வேண்டும் என்று அறிவுறுத்தப்பட்டுள்ளது.
இது குறித்து கருத்து தெரிவித்த பாகிஸ்தான் டென்னிஸ் கூட்டமைப்பின் தலைவர் சலீம் சைஃபுல்லா கான், சர்வதேச டென்னிஸ் கூட்டமைப்பின் இந்த முடிவு விளையாட்டில் உள்ள அரசியல். இது துரதிர்ஷ்டவசமான ஒன்று என்றும் அதிருப்தி தெரிவித்திருந்தார்.
முன்னதாக இந்த டேவிஸ் கோப்பை டென்னிஸ் தொடர் கடந்த செப்டம்பர் மாதம் நடைபெறவிருந்தது. ஆனால் அச்சமயத்தில் ஜம்மு காஷ்மீருக்கு வழங்கப்பட்டு வந்த சிறப்புத் தகுதிச் சட்டம் விலக்கப்பட்டதால், இந்தியா-பாகிஸ்தான் இடையோன உறவில் விரிசல் ஏற்பட்டது. இதனால் பாதுகாப்பு அச்சுறுத்தல் நிலவுவதாக இந்தியா கூறியதால் அப்போட்டி ஒத்திவைக்கப்பட்டது என்பது குறிப்பிடத்தக்கது.
