பாரீஸ் : களிமண் தரை டென்னிஸ் தொடரான பிரஞ்சு ஓபன் டென்னிஸ் தொடர் கோலாகலமாக தொடங்கி நடைபெற்று வருகிறது. முதல் சுற்றில் கிரீஸ் நட்சத்திர வீரர் சிட்சிபாஸ் வெற்றியுடன் தொடங்கி உள்ளார்.
டென்னிஸ் விளையாட்டில் உயர்ந்த அந்தஸ்து கொண்ட தொடராக கருதப்படுவது கிராண்ட்ஸ்லாம் போட்டியாகும். ஆண்டுதோறும் 4 கிராண்ட்ஸ்லாம் தொடர்கள் நடைபெறுகின்றன. ஆஸ்திரேலிய ஓபன், பிரஞ்சு ஓபன், விம்பிள்டன் டென்னிஸ் மற்றும் அமெரிக்கன் ஓபன் ஆகியவை அந்த 4 கிராண்ட்ஸ்லாம் தொடர்களாகும்.
இதில் ஆண்டு தொடக்கத்தில் ஆஸ்திரேலியன் ஓபன் டென்னிஸ் நடைபெறும். பெரும்பாலும் ஜனவரி 15-ஆம் தேதி தொடங்கி 28-ஆம் தேதி வரை ஆஸ்திரேலிய ஓபன் டென்னிஸ் நடைபெறும். சிலநேரங்களில் தவிர்க்க முடியாத காரணங்களால் அந்த தேதிகளில் இருந்து போட்டி தள்ளிப்போகலாம்.
அதேபோல் மே முதல் ஜூன் வரையில் பிரெஞ்சு ஓபன் டென்னிசும், ஜூன் முதல் ஜூலையில் விம்பிள்டன் டென்னிசும் நடைபெறும். ஆண்டின் இறுதியில் (ஆகஸ்ட்- செப்டம்பர்) அமெரிக்கன் ஓபன் நடைபெறும். ஓர் ஆண்டில் இந்த 4 கிராண்ட்ஸ்லாம் தொடர்களையும் வெல்ல வேண்டும் என்பதே ஒவ்வொரு டென்னிஸ் வீரரின் மிகப் பெரிய கனவாக இருக்கும்.
அந்த வகையில் மற்ற கிரண்டாஸ்லாம் தொடர்களை காட்டிலும் பிரஞ்சு ஓபன் டென்னிஸ் சிறப்பு வாய்ந்ததாக கருதப்படுகிறது. காரணம் என்னவென்றால் களிமண் தரையில் டென்னிஸ் போட்டிகள் நடத்தப்படுவதே இதன் சிறப்பாக கூறப்படுகிறது. நடப்பு சீசனுக்கான பிரஞ்சு ஓபன் டென்னிஸ் தொடர் பாரீஸ் நகரில் தொடங்கி நடைபெற்று வருகிறது.
பிரெஞ்சு ஓபனில் ஸ்பெயின் ஜாம்பவான் ரபெல் நடால் ஆதிக்கம் செலுத்தி வருகிறார். 2005ஆம் ஆண்டு பிரெஞ்சு ஓபன் டென்னிஸ் தொடரில் அறிமுகமான நடால் இதுவரை 14 முறை சாம்பியன் பட்டம் வென்று உள்ளார். பிரஞ்சு ஓபன் டென்னிசில் 112 ஆட்டங்களில் வெற்றி பெற்று உள்ள நடால் வெறும் 3 ஆட்டங்களில் மட்டுமே தோல்வியை சந்தித்து உள்ளார்.
22 கிராண்ட்ஸ்லாம் பட்டம் வென்ற நடப்பு சாம்பியன் ரபெல் நடால் இடுப்பு பகுதியில் ஏற்பட்ட காயம் காரணமாக முதல் முறையாக பிரஞ்சு ஓபன் டென்னிஸ் தொடர்ந்து விலகி உள்ளார். இதனால் இந்த முறை ஆண்கள் ஒற்றையர் பிரிவில் புதிய சாம்பியன் உருவாக வாய்ப்பு உள்ளதாக கருதப்படுகிறது. இதேபோல் முன்னாள் சாம்பியனான இங்கிலாந்து வீரர் ஆன்டி முர்ரேவும் போட்டியில் இருந்து விலகி உள்ளதாக கூறப்படுகிறது.
ஒற்றையர் பிரிவில் நம்பர் ஒன் வீரரான கார்லஸ் அல்காரஸ், நட்சத்திர ஜோகோவிச் உள்ளிட்டோரில் ஒருவர் சாம்பியன் பட்டம் வெல்வார் என எதிர்பார்க்கப்படுகிறது. அதேநேரம் முன்னாள் நம்பர் ஒன் வீரர் டேனில் மெட்விடேவ் (ரஷ்யா), சிட்சிபாஸ் (கிரீஸ்), ஹோல்ஜர் ரூனே (டென்மார்க்), கேஸ்பர் ரூட் (நார்வே) ஆகியோரும் பட்டத்துக்கான ரேசில் முன்னிலை வகிப்பார்கள் என்பதில் சந்தேகமில்லை.
அதேநேரம் பெண்கள் ஒற்றையர் பிரிவில் நடப்பு சாம்பியனும், நம்பர் ஒன் வீராங்கனையுமான இகா ஸ்வியாடெக் (போலந்து) மீண்டும் கோப்பையை வெல்லும் முனைப்பில் களமிறங்கி உள்ளார். ஆஸ்திரேலிய ஓபன் சாம்பியன் அரினா சபலென்கா (பெலாரஸ்), விம்பிள்டன் சாம்பியன் எலினா ரைபகினா (கஜகஸ்தான்), கோகோ காப் (அமெரிக்கா), ஆன்ஸ் ஜாபியர் (துனிசியா), ஜெசிகா பெகுலா (அமெரிக்கா) ஆகியோரில் ஒருவர் பட்டம் வெல்ல அதிக வாய்ப்பு இருப்பதாக எதிர்பார்க்கப்படுகிறது.
பரிசுத் தொகை இவ்வளவா?
பிரஞ்சு ஓபன் டென்னிஸ் தொடருக்கான மொத்த பரிசுத் தொகை 439 கோடி ரூபாயாகும். இதில் ஒற்றையர் பிரிவில் பட்டம் வெல்பவர்களுக்கு 20 கோடியே 25 லட்ச ரூபாயும், 2-வது இடம் பிடிப்பவர்களுக்கு 10 கோடி ரூபாயும் பரிசாக வழங்கப்படும். இரட்டையர் பிரிவில் கோப்பையை வெல்பவர்களுக்கு 5 கோடியே 25 லட்ச ரூபாய் பரிசாக கிடைக்கும்.
இதையும் படிங்க : "இது தான் கடைசி போட்டி" ஓய்வை அறிவித்த சிஎஸ்கே வீரர்!
