ஹாக்கி ஜாம்பவான், இளம் வீரர்களின் நம்பிக்கை நட்சத்திரம், நானாஜி என அனைவராலும் அன்போடு அழைக்கப்பட்டவர் பல்பீர் சிங் (96). இவர், கடந்த 8ஆம் தேதி உடல்நலக் குறைவு காரணமாக மொகாலியிலுள்ள மருத்துவமனையில் அனுமதிக்கப்பட்டார்.
அவருக்கு மருத்துவர்கள் தீவிர சிகிச்சை அளித்துவந்த சூழலில் அவரது உடல்நிலை ஆபத்தான நிலையில் இருப்பதாக மருத்துவர்கள் தெரிவித்திருந்தனர். இந்நிலையில், சிகிச்சைப் பலனின்றி இன்று காலை 6.30 மணி அளவில் அவர் காலமானார்.
இந்திய ஹாக்கியில் ஜாம்பவானாக வலம்வந்த பல்பீர் சிங், 1948 லண்டன் ஒலிம்பிக், 1952 ஹெல்சின்கி ஒலிம்பிக், 1956 மெல்போர்ன் ஒலிம்பிக் ஆகியவற்றில் இந்திய ஹாக்கி அணி தங்கப் பதக்கத்தை கைப்பற்ற மிக முக்கியக் காரணமாக இருந்தவர்.
1956ஆம் ஆண்டுக்கான ஒலிம்பிக் தொடரில் நெதர்லாந்து அணியை இந்திய அணி 6-1 என வீழ்த்தியது. அதில் ஐந்து கோல்கள் அடித்து பல்பீர் சிங் சாதனைப் படைத்தார்.
இதன்மூலம் சர்வதேச ஹாக்கிப் போட்டியில் தனிநபரால் அடிக்கப்பட்ட அதிகபட்ச கோல் கணக்கு இதுவாகும். இந்தச் சாதனை இன்றுவரை யாராலும் முறியடிக்கப்படவில்லை என்பது கவனிக்கத்தக்கது.
அவரின் திறமைக்குப் பெருமை சேர்க்கும்விதமாக விளையாட்டுத் துறையில் சாதனைப் படைப்பவர்களுக்கு மத்திய அரசால் வழங்கப்படும் மிக உயரிய விருதான பத்மஸ்ரீ விருது 1957ஆம் ஆண்டு இவருக்கு வழங்கப்பட்டது.
இதையும் படிங்க:சச்சின் விக்கெட்டை வீழ்த்தியது எனது அதிர்ஷ்டம்...!
