இன்றைய ஐபிஎல் போட்டியில் ரெய்னா தலைமையிலான சென்னை சூப்பர் கிங்ஸ் அணியை எதிர்த்து வில்லியம்சன் தலைமையிலான சன்ரைசர்ஸ் ஹைதராபாத் அணி மோதுகிறது. புள்ளிப் பட்டியலில் முதலிடத்தில் இருக்கும் சென்னை அணி அசாதாரணமான ஆட்டத்தை வெளிப்படுத்தி வருகிறது. அதேபோல் ஹைதராபாத் அணி இந்த தொடரின் தொடக்கத்தில் சிறப்பாக செயல்பட்டாலும் தொடர்ந்து பெற்ற தோல்விகளால் 6 புள்ளிகளுடன் ஆறாவது இடத்தில் உள்ளது.
ஹைதராபாத் அணியைப் பொறுத்தவரையில் தொடக்க வீரர்களான வார்னர் - பெயர்ஸ்டோவ் ஆகியோரை நம்பியே ஆடுகிறது. கடந்த போட்டியில் இந்த இருவரும் ஆட்டமிழந்ததும் அடுத்தடுத்து விக்கெட்டுகளை இழந்து தோல்வியடைந்தது. மேலும் கடந்த தொடரில் சென்னை - ஹைதராபாத் அணிகள் மோதிய நான்கு போட்டியிலும் (இறுதிப் போட்டி உட்பட) ஹைதராபாத் அணி தோல்வியடைந்துள்ளதால், இந்த ஆட்டத்தில் பதிலடி கொடுக்கும் என ரசிகர்களால் எதிர்பார்க்கப்படுகிறது.
சென்னை அணியைப் பொறுத்தவரையில் ஒவ்வொரு போட்டிக்கும் ஒரு வீரர் ஹீரோ அவதாரம் எடுத்து வெற்றியைப் பெற்றுத் தருவதால் அந்த அணி இந்தமுறையும் சிறப்பான ஆட்டத்தை வெளிப்படுத்தும் என எதிர்பார்க்கப்படுகிறது. இன்றைய போட்டியில் சென்னை அணியில் தோனி, சான்ட்னர் ஆகியோருக்கு பதிலாக சாம் பில்லிங்ஸ், கரண் ஷர்மா ஆகியோர் இடம்பெற்றுள்ளனர். ஹைதராபாத் அணியில் ரிக்கி, அபிஷேக் ஷர்மா ஆகியோருக்கு பதிலாக யூசுப் பதான், நதீம் இடம்பெற்றுள்ளனர்.
ஹைதராபாத் அணி விவரம் : வில்லியம்சன்(கேப்டன்), புவனேஷ்வர் குமார், வார்னர், பெயர்ஸ்டோவ், விஜய் சங்கர், கலீல் அஹ்மத், சந்தீப் ஷர்மா, ரஷீத் கான், தீபக் ஹூடா, நதீம், யூசுப் பதான்
சென்னை அணி விவரம் : சுரேஷ் ரெய்னா(கேப்டன்), ஷேன் வாட்சன், டூ ப்ளஸிஸ், அம்பாதி ராயுடு, கேதார் ஜாதவ், ஜடேஜா, தீபக் சாஹர், இம்ரான் தாஹிர், சாம் பில்லிங்ஸ், கரண் ஷர்மா
