இந்திய கிரிக்கெட் அணியின் ஆஸ்தான விக்கெட் கீப்பராக கடந்த பத்து ஆண்டுகளுக்கும் மேலாக இருந்த முன்னாள் கேப்டன் தோனி, உலகக்கோப்பை தொடருக்குப்பின் அணியிலிருந்து விலகியிருந்துவருகிறார். ஒருபுறம் தோனியின் ஓய்வு குறித்து பலரும் விமர்சித்தாலும் அவரது இடத்தை அடுத்து யார் நிரப்புவார்கள் என்ற கேள்வியும் அனைவரிடத்திலும் இருந்துவருகிறது.
தோனியின் இடத்தை பூர்த்தி செய்வதற்காக இளம் விக்கெட் கீப்பரான ரிஷப் பந்திற்கு தொடர்ச்சியாக பல்வேறு உள்நாட்டு, வெளிநாட்டு தொடர்களில் வாய்ப்பளிக்கப்பட்டுவருகிறது. ஆனால் அவர் தோனி விட்டுச் சென்ற பெரிய இடத்தை நிரப்ப வேண்டும் என்று கட்டாயத்தில் களமிறங்குவதால் விக்கெட் கீப்பிங், பேட்டிங் என இரண்டிலும் சோபிக்க முடியாமல் உள்ளார்.
இதனிடையே, சமீபத்தில் நடைபெற்ற ஆஸ்திரேலியாவுக்கு எதிரான ஒருநாள் போட்டித் தொடரின் முதல் போட்டியில் காயம் காரணமாக வெளியேறிய ரிஷப் பந்திற்கு பதிலாக கே.எல். ராகுல் விக்கெட் கீப்பிங் பொறுப்பை ஏற்றார். அதைத் தொடர்ந்து நடைபெற்ற இரண்டு போட்டிகளிலும் ராகுலே விக்கெட் கீப்பராக செயல்பட்டார்.
மேலும், தற்போது நடைபெற்றுவரும் நியூசிலாந்துக்கு எதிரான டி20 தொடரிலும் ராகுலே விக்கெட் கீப்பராக உள்ளார். இதனால், ரிஷப் பந்த்தின் இடத்தை ராகுல் எடுத்துக்கொண்டதாகவும், இனி அவருக்கு வாய்ப்பு கிடைக்காது என்பது போன்ற கருத்துகளும் ரசிகர்கள் மத்தியில் எழத் தொடங்கியுள்ளது.
இதனிடையே நேற்று சென்னையில் நடைபெற்ற 83 பாலிவுட் திரைப்பட போஸ்டர் வெளியீட்டு விழாவில் கலந்துகொண்ட இந்திய அணியின் முன்னாள் கேப்டனான கபில் தேவிடம் ரிஷப் பந்த் குறித்த கேள்வி எழுப்பப்பட்டது.
அதற்கு பதிலளித்த அவர், "பந்த் மிகவும் திறமைவாய்ந்த வீரர். அவர் யாரையும் குறை கூற முடியாது. அவரது கிரிக்கெட் வாழ்க்கையை அவர்தான் பார்த்துக்கொள்ள வேண்டும். தொடர்ந்து ரன் குவிப்பில் ஈடுபடுவதே அவருக்கு இருக்கும் ஒரே வழி.
பந்த், தனது பேட்டிங்கின் மூலம் தன்னைப்பற்றி குறை கூறியவர்களின் கூற்றை தவறு என்று நிரூபிக்க வேண்டும். திறமையின் மூலம் பிறரது கருத்துகளைத் தவறு என்பதை நிரூபிக்க வேண்டியது உங்களின் கடமை" என்றார். மேலும், தங்களை அணியிலிருந்து டிராப் செய்ய தேர்வாளர்களுக்கு வீரர்கள் வாய்ப்பளிக்கக் கூடாது என்றும் அறிவுறுத்தினார்.
இதையும் படிங்க: சொந்த மண்ணில் முதல் டி20 தொடரை வென்ற பாகிஸ்தான்!
