கரோனா வைரஸ் காரணமாக கிரிக்கெட் போட்டிகள் கடந்த இரண்டு மாதங்களாக முடங்கியுள்ளன. குறிப்பாக மார்ச் 29ஆம் தேதி நடைபெறவிருந்த ஐபிஎல் தொடரும் தேதி குறிப்பிடப்படாமல் ஒத்திவைக்கப்பட்டுள்ளது.
இதேபோல் இங்கிலாந்து, வெஸ்ட் இண்டீஸ் அணிகளுக்கு இடையே இங்கிலாந்தில் நடைபெறவிருந்த 3 போட்டிகள் கொண்ட டெஸ்ட் தொடரும் ஒத்தி வைக்கப்பட்டிருந்தது.
இந்த நிலையில் இங்கிலாந்தில் கரோனா வைரஸ் தாக்கம் கட்டுக்குள் வந்ததையடுத்து இந்தத் தொடர் நடைபெறும் என இருநாட்டு கிரிக்கெட் வாரியங்களும் தெரிவித்திருந்தன.
இந்நிலையில் இந்தத் தொடருக்கான புதிய தேதி அறிவிக்கப்பட்டுள்ளது. அதன்படி இவ்விரு அணிகளுக்கு இடையிலான முதல் டெஸ்ட் போட்டி ஜூலை எட்டாம் தேதி சவுத்ஹம்டனில தொடங்க உள்ளது.
இதைத் தொடர்ந்து இரண்டாவது டெஸ்ட் போட்டி ஜூலை 16ஆம் தேதியும், மூன்றாவது டெஸ்ட் போட்டி ஜூலை 24ஆம் தேதியும் ஓல்ட் டிரஃபோர்ட் மைதானத்தில் நடைபெற உள்ளன. இந்தப் போட்டிகள் அனைத்தும் பார்வையாளர்களின்றி நடைபெறும் என இங்கிலாந்து கிரிக்கெட் வாரியம் தெரிவித்துள்ளது.
இந்தத் தொடரில் பங்கேற்பதற்காக வெஸ்ட் இண்டீஸ் வீரர்கள் வரும் ஜூன் 9ஆம் தேதி இங்கிலாந்துக்கு வருகை தர உள்ளதாகவும் இங்கிலாந்து கிரிக்கெட் வாரியம் கூறியுள்ளது.
