தற்காலத்தின் சிறந்த கிரிக்கெட் வீரராகத் திகழும் இந்திய அணியின் கேப்டன் விராட் கோலி ஒருநாள், டி20, டெஸ்ட் என அனைத்து விதமான போட்டிகளிலும் பல்வேறு சாதனைகளைப் படைத்துவருகிறார். இந்நிலையில், ஹைதராபாத்தில் வெஸ்ட் இண்டீஸ் அணிக்கு எதிராக நேற்று நடைபெற்ற முதல் டி20 போட்டியில் இந்திய அணி ஆறு விக்கெட்டுகள் வித்தியாசத்தில் வெற்றிபெற்றது.
இதில், 208 ரன்கள் இலக்குடன் களமிறங்கிய இந்திய அணி கோலியின் சிறப்பான பேட்டிங்கால் 18.4 ஓவர்களிலேயே வெற்றி இலக்கை எட்டியது. இப்போட்டியில் 50 பந்துகளை எதிர்கொண்டு ஆறு பவுண்டரி, ஆறு சிக்சர் என 94 ரன்களுடன் இறுதிவரை களத்தில் ஆட்டமிழக்காமல் இருந்த கோலிக்கு ஆட்டநாயகன் விருது கிடைத்தது.
சர்வதேச டி20 போட்டிகளில் அவர் பெறும் 12ஆவது ஆட்டநாயகன் விருது இதுவாகும். இதன் மூலம், சர்வதேச டி20 போட்டிகளில் அதிகமுறை ஆட்டநாயகன் விருது பெற்றவர்கள் பட்டியலில் அவர், ஆப்கானிஸ்தான் அணியின் ஆல்ரவுண்டர் முகமது நபியுடன் முதலிடத்தைப் பகிர்ந்துகொண்டுள்ளார். முகமது நபி இதுவரை விளையாடிய 75 போட்டிகளில் 12 முறை ஆட்டநாயகன் விருது பெற்றிருந்த நிலையில், கோலி 73 போட்டிகளிலேயே இச்சாதனையை எட்டியுள்ளார்.
அதுமட்டுமின்றி, இப்போட்டியில் அவர் அடித்த 94 ரன்கள்தான், சர்வதேச டி20 போட்டிகளில் அவர் எடுத்த அதிகபட்ச ஸ்கோராகும். முன்னதாக, 2016இல் ஆஸ்திரேலிய அணிக்கு எதிராக அடிலெய்டில் நடைபெற்ற முதல் டி20 போட்டியில் அவர் எடுத்த 90 ரன்களே, அவரது அதிகபட்ச ஸ்கோராக இருந்தது நினைவுகூரத்தக்கது. இதைத்தொடர்ந்து, இந்தியா - வெஸ்ட் இண்டீஸ் அணிகளுக்கிடையிலான இரண்டாவது டி20 போட்டி நாளை திருவனந்தபுரத்தில் நடைபெறவுள்ளது.
சர்வதேச டி20 போட்டிகளில் அதிகமுறை ஆட்டநாயகன் விருது பெற்றவர்கள்:
- கோலி (இந்தியா) / முகமது நபி (ஆப்கானிஸ்தான்) - 12
- அஃப்ரிடி (பாகிஸ்தான்) - 11
- கிறிஸ் கெயில் (வெஸ்ட் இண்டீஸ்) - 9
- ஷேன் வாட்சன் (ஆஸ்திரேலியா) - 9
- முகமது ஷெசாத் (ஆப்கானிஸ்தான்) - 9
- டேவிட் வார்னர் (ஆஸ்திரேலியா) - 9
- முகமது ஹஃபிஸ் (பாகிஸ்தான்) - 9
- ரோஹித் சர்மா (இந்தியா) - 9
இதையும் படிங்க: ஸ்மித்துடனான ரேஸில் முந்திய கோலி😎! ஐசிசி டெஸ்ட் ரேங்கிங்ஸ் வெளியீடு!
