'மாஸ்டர்' படத்தை அடுத்து நெல்சன் திலீப் குமார் இயக்கத்தில் நடிகர் விஜய் நடித்துவருகிறார். அவருக்கு ஜோடியாக நடிகை பூஜா ஹெக்டே நடிக்கிறார். தற்காலிகமாக ‘தளபதி 65’ என்று அழைக்கப்படும் இந்தப் படத்தில் மலையாள நடிகை அபர்ணா தாஸ் முக்கியக் கதாபாத்திரத்தில் நடிக்கிறார். சன் பிக்சர்ஸ் தயாரிப்பில் உருவாகும் இந்தப் படத்திற்கு அனிருத் இசையமைக்கிறார்.
இந்தப் படத்தின் முதற்கட்ட படப்பிடிப்பு ஜார்ஜியாவில் தொடங்கி நடைபெற்றுவந்தது. இந்நிலையில் அங்கு தொடர்ச்சியாக 18 நாள்கள் படப்பிடிப்புப் பணிகளில் ஈடுபட்ட படக்குழு தற்போது சென்னை திரும்பியுள்ளது.
இதை உறுதிப்படுத்தும்விதமாக நடிகர் விஜய் சென்னை விமான நிலையம் வந்தடைந்தபோது எடுக்கப்பட்ட காணொலியும் சமூக வலைதளங்களில் வெளியாகி பரவிவருகிறது.
ஜார்ஜியாவில் 'தளபதி 65' படத்தின் சண்டைக்காட்சிகள் உள்பட பல முக்கியக் காட்சிகள் படமாக்கப்பட்டதாகக் கூறப்படுகிறது. மேலும் நடிகர் விஜய் - பூஜா ஹெக்டேவின் டூயட் பாடல் ஒன்றையும் படமாக்கியுள்ளதாகத் தகவல் வெளியாகியுள்ளது.
