கடந்த 2015 ஆம் ஆண்டு திரைப்பட தயாரிப்பாளர் அன்புவேல் ராஜன் தயாரிப்பில், ’வீர தீர சூரன்’ என்ற திரைப்படத்தில் நடிகர்கள் விஷ்ணு விஷால், சூரி ஆகியோர் நடிப்பதாக ஒப்பந்தமாகி படப்பிடிப்புகள் நடந்தன. அப்போது சூரிக்கு 40 லட்ச ரூபாய் சம்பளம் பேசப்பட்டுள்ளது. எனினும் சம்பளம் தராதது குறித்து சூரி கேட்டபோது, சம்பளத்திற்குப் பதிலாக மேலும் சில கோடிகளை கொடுத்தால் நிலம் வாங்கித் தருவதாக படத்தயாரிப்பாளர் அன்புவேல் ராஜனும், ஓய்வு பெற்ற டிஜிபி ரமேஷ் குடவாலாவும் (விஷ்ணு விஷாலின் தந்தை) கூறியதாகத் தெரிகிறது.
அதன்படி, சென்னையை அடுத்த சிறுசேரியில் நிலம் வாங்கி தருவதாகக்கூறி, ரமேஷ் குடவாலா மற்றும் அன்புவேல் ராஜன் இருவரும் நடிகர் சூரியிடம் ரூ.3.10 கோடி பெற்று நிலத்தை விற்பனை செய்தனர். நிலம் வாங்கிய பிறகு அதில் பல பிரச்சனைகள் இருப்பது தெரிந்த சூரியிடம், நிலத்தைத் திருப்பி வாங்கி கொள்வதாகவும், பணத்தை திருப்பி தருவதாகவும் ஒப்பந்தம் ஒன்றை ரமேஷ் குடவாலா பதிவு செய்துள்ளார்.
ஆனால், வாங்கிய பணத்தில் 40 லட்ச ரூபாய் மட்டுமே சூரியிடம் கொடுக்கப்பட்டு, மீதி ரூ.2.70 கோடியை தராமல் ஏமாற்றி வந்ததாகக் கூறப்படுகிறது. இதையடுத்து, சைதாப்பேட்டை நீதிமன்றத்தில் சூரி தொடர்ந்த வழக்கில், முன்னாள் டிஜிபி ரமேஷ் குடவாலா மற்றும் அன்புவேல் ராஜன் ஆகியோர் மீது வழக்குப்பதிவு செய்யுமாறு நீதிமன்றம் கடந்த மாதம் உத்தரவிட்டது.
இது தொடர்பாக காவல் ஆணையர் அலுவலகத்தில் சூரி கடந்த 1 ஆம் தேதி புகாரளித்ததையடுத்து, அடையாறு காவல்துறையினர் ரமேஷ் குடவாலா, அன்புவேல் ராஜன் ஆகிய இருவர் மீதும் 5 பிரிவுகளின் கீழ் வழக்குப்பதிவு செய்துள்ளனர். இந்நிலையில், ரமேஷ் குடவாலா முன்னாள் டிஜிபி என்பதால், அவர் மீதான விசாரணையை மத்திய குற்றப்பிரிவில் இருந்து சிபிஐக்கு மாற்றக்கோரி, உயர் நீதிமன்றத்தில் சூரி தொடர்ந்த வழக்கு இன்று(அக்.16) நீதிபதி ரவீந்திரன் முன்பு விசாரணைக்கு வந்தது.
அப்போது, ரமேஷ் குடவாலா முன்னாள் டிஜிபி என்பதால் அவருக்கு எதிராக விசாரணை நடத்தும் அதிகாரிகள் அவருக்கு சாதகமாக செயல்படுவதாக சூரி தரப்பில் புகார் தெரிவிக்கப்பட்டது. மேலும், இருவர் மீதான விசாரணையை மத்திய குற்றப்பிரிவில் இருந்து வேறு அமைப்புக்கு மாற்ற வேண்டும் எனவும் கோரிக்கை வைக்கப்பட்டது.
இதையடுத்து, இருவரிடம் நடத்தப்பட்ட விசாரணை அறிக்கையை நவம்பர் இறுதி வாரத்தில் தாக்கல் செய்ய மத்திய குற்றப்பிரிவுக்கு உத்தரவிட்ட நீதிபதி, விசாரணையை ஒத்திவைத்து உத்தரவிட்டார்.
இதையும் படிங்க: தனக்கு எதிரான தேர்தல் வழக்கை நிராகரிக்கக்கோரி எம்பி ரவீந்திரநாத்குமார் தாக்கல் செய்த மனு தள்ளுபடி
