ரூபி ஃபிலிம்ஸ் நிறுவனம் சார்பில் ஹஷீர் தயாரிக்கும் படத்தை நடிகர் போஸ் வெங்கட் இயக்குகிறார். இப்படம் மூலம் இயக்குநராக அறிமுகமாகிறார்.
புதுமகங்களை வைத்து தயாராகி வரும் இந்த படத்தில், ஆட்டோ ஓட்டுநர்கள் தினமும் எதிர்கொள்ளும் சவால்கள், சோதனைகள் மற்றும் பெருமைகளை எடுத்து சொல்லும் விதத்தில் பாடல் ஒன்று சமீபத்தில் பதிவு செய்யப்பட்டுள்ளது. இப்பாடலை பாடி பாடகராக அடுத்த அவதாரத்தை எடுத்துள்ளார் காமெடி நடிகர் ரோபோ சங்கர்.
இதுகுறித்து இயக்குநர் போஸ் வெங்கட் கூறுகையில், "நான் ஒரு ஆட்டோ டிரைவராக என் தொழிலை தொடங்கினேன். அதற்கு மரியாதை செய்வதற்காக படத்தில் ஒரு பாடலை வைக்க முடிவெடுத்தேன். அப்பாடலை ராகம் மற்றும் ஸ்ருதி பற்றி எதுவும் தெரியாத ஒருவர்தான் பாட வேண்டும் என்று நினைத்தேன்.
சாதாரண ஒரு தொழிலாளி பாடுவதை போல பாடல் இருக்க வேண்டும் என்று அதற்கான குரல் தேடலில் இருந்தபோது, ரோபோ ஷங்கரின் குரல் மிகவும் பொருத்தமாக இருந்தது. அவரும் பாடுவதற்கு தயக்கமின்றி சம்மதித்தார். அவரின் குரலின் தன்மைக்கு ஏற்ப இசையமைப்பாளர் ஹரி சாய், சில துள்ளலான விஷயங்களை சேர்த்துக் கொண்டார்" என்றார்.
