சென்னை: ஹாரர் கலந்த திரில்லர் பாணியில் ஐந்து மொழிகளில் உருவாகிறது 'பாம்பாட்டம்' திரைப்படம்.
6.2, ஓரம்போ, வாத்தியார் போன்ற வெற்றிப்படங்களை தயாரித்த வைத்தியநாதன் பிலிம் கார்டன் நிறுவனம் பிரமாண்டமான முறையில் தயாரிக்கும் படம் 'பாம்பாட்டம்'. இந்தப் படத்தில் காக்க காக்க, திருட்டுப்பயலே, நான் அவனில்லை போன்ற வெற்றி படங்களில் நடித்த ஜீவன் கதாநாயகனாக நடிக்கிறார்.
தொடர்ந்து ஹாரர் படங்களை இயக்கி வரும் வி.சி வடிவுடையான் தற்போது ஹாரர் கலந்த திரில்லர் கதையை மையமாக வைத்து மிக பிரமாண்டமான பொருட்செலவில் பாம்பாட்டம் படத்தை இயக்குகிறார்.
படம் குறித்து இயக்குநர் வடிவுடையான் கூறுகையில்,
’நடிகர் ஜீவன் நடிக்கும் முதல் ஹாரர் திரில்லர் படம் 'பாம்பாட்டம்'. படத்தின் கதையை கேட்டவுடனே நடிப்பதற்கு ஒப்புக்கொண்டார்.
இதுவரை ஹாரர் படங்களில் பார்த்திராத திரைக்கதையை இந்தப் படத்தில் பார்க்கலாம். அந்த அளவுக்கு கதைக்கு முக்கியத்துவம் கொடுத்துள்ளோம்.
தமிழ், தெலுங்கு, இந்தி, கன்னடம், மலையாளம் ஆகிய ஐந்து மொழிகளில் பிரமாண்டமான முறையில் தயாராகிறது. இந்த ஐந்து மொழிகளிலிருந்தும் முன்னணி நடிகர்கள் நடிக்க இருக்கிறார்கள்.
முன்னணி கிராபிக்ஸ் நிறுவனம் படத்துக்கான கிராபிக்ஸ் காட்சிகளை வடிவமைக்க இருக்கிறது. படத்தின் படப்பிடிப்பு இம்மாதத்தில் தொடங்கவுள்ளது.
சென்னை, ஹைதராபாத், மும்பை உள்ளிட்ட இடங்களில் படப்பிடிப்பு நடத்தத் திட்டமிடப்பட்டுள்ளது’ என்றார்.
