டெல்லி: புதிய தொழில்நுட்பங்கள், அசத்தலான அம்சங்களுடன் புதிய மாருதி ஸ்விஃப்ட் அறிமுகப்படுத்தப்பட்டு உள்ளது. இதுவரை 24 லட்சம் பயனர்கள் மாருதி ஸ்விஃப்ட் கார்களின் பயனர்களாக உள்ளனர். இச்சூழலில் தனது புதிய ஸ்விஃப்ட் பதிப்பை மாருதி சுசூகி நிறுவனம் வெளியிட்டுள்ளது.
2018ஆம் ஆண்டு அறிமுகம் செய்யப்பட்ட மூன்றாம் தலைமுறை மாருதி ஸ்விஃப்ட் காரின் பொலிவு கூட்டப்பட்ட பதிப்பாக இந்தப் புதிய ஸ்விஃப்ட் 2021 வந்துள்ளது. இந்தக் காரின் முன்புற க்ரில் அமைப்பில் தேன்கூடு பின்னல் வலை அமைப்பு மற்றும் க்ரோம் பட்டையுடன் புதிய பொலிவு கண்டுள்ளது.
புதிய ஸ்விஃப்ட் காரில் இரட்டை வண்ணத் தேர்வுகள் அறிமுகம் செய்யப்பட்டுள்ளன. இது டாப் வேரியண்ட்டில் மட்டுமே கிடைக்கும். கறுப்பு வண்ண கூரையுடன் பியர்ல் ஆர்டிக் ஒயிட் மற்றும் சாலிட் ஃபயர் ரெட் ஆகிய வண்ணத் தேர்வுகளும், வெள்ளை வண்ண கூரையுடன் மிட்நைட் புளூ வண்ணத் தேர்வும் அறிமுகம் செய்யப்பட்டுள்ளன.
காரின் உள் அமைப்பு
உட்புறத்தில் கறுப்பு வண்ண இன்டீரியர் தக்க வைக்கப்பட்டு இருக்கிறது. 7 அங்குல தொடுதிரையுடன் இன்ஃபோடெயின்மென்ட் சிஸ்டம், க்ரூஸ் கன்ட்ரோல் வசதி, ஆட்டோமேட்டிக் க்ளைமேட் கன்ட்ரோல், ரியர் வியூ கேமரா, கீ லெஸ் என்ட்ரி ஆகியவை இடம்பெற்றுள்ளன. ஸ்மார்ட்பிளே ஸ்டூடியோ அப்ளிகேஷன் மூலமாக நிகழ்நேர முறையில் போக்குவரத்து நிலவரம் குறித்த தகவல்களையும் பெற முடியும்.
விஎக்ஸ்ஐ வேரியண்ட்டில் புதிய ஆடியோ சிஸ்டம் கொடுக்கப்பட்டு இருக்கிறது. வால்யூம் கன்ட்ரோல் மற்றும் பாடல்களை மாற்றுவதற்கான டிராக் சேஞ்ச் போன்வற்றை தொடு உணர் பொத்தான்கள் மூலமாக மாற்ற முடியும். புளூடூத், யுஎஸ்பி மற்றும் ஆக்ஸ் போர்ட் ஆகியவையும் தக்க வைக்கப்பட்டுள்ளன.
புதிய பெட்ரோல் எஞ்சின்
புதிய மாருதி ஸ்விஃப்ட் காரில் முக்கிய அம்சமாக புதிய 1.2 லிட்டர் டியூவல் ஜெட் பெட்ரோல் எஞ்சின் பொருத்தப்பட்டுள்ளது. இந்த எஞ்சின் அதிகபட்சமாக 90 எச்பி பவரையும், 113 என்எம் டார்க் திறனையும் வழங்கும். புதிய மாருதி ஸ்விஃப்ட் காரில் 5 ஸ்பீடு மேனுவல் அல்லது ஏஎம்டி கியர்பாக்ஸ் தேர்வுகள் கொடுக்கப்படுகின்றன.
